ba phul bas gser gyi khri la za 'og gi 'bol gsum brtsegs dang gab rtse'i gdan la slob dpon pad ma bzhugs/ dngul gyi khri za 'og gi 'bol gsum brtsegs dang gab rtse'i gdan dang bcas pa la mkhan po bo dhi sa twa bzhugs/ gong gral la rgyal po nyid bzhugs/ g.yon gral la cog ro klu'i rgyal mtshan dang ska ba dpal brtsegs gnyis gab rtse'i khri la bzhugs/ de nas slob dpon gnyis la gser gyi maNDal khri gang pa re la g.yu'i me tog gi tshom bu gling bzhi ri rab gling phran nyi zlas brgyan pa phul/ lo tsA ba gnyis la yang rin po che'i maNDal re re phul nas chos gsung par zhu ba ni/ e ma ho/ rgya gar chos kyi yul du sku 'khrungs pa'i/ /dam chos rin po che la mnga' brnyes pa/ /mkhas pa chen po paNDi tar gyur pa/ /slob dpon chen po rnam gnyis kyis/ /gsang sngags dang ni mtshan nyid kyi/ /chos ni gsung bar zhu ba 'bul/ /lo tsA gnyis kyis bsgyur bar zhu/ /bod yul mun par 'thibs pas na/ /chos kyi sgron me spor bar zhu/ /
zhes zhus pas slob dpon gnyis kyis gnang ba/ e ma ho/ rgyal po chen po bod kyi mi rnams la ni dad pa med/ blon po chen po rnams ni chos la gnag pas/ rgyal po nyid kyi chos kyi bka' khrims dam po dar gyi mdud pa 'dra ba bca' dgos pas 'chos shig gsungs nas/ lug gi lo gzhug nas spre'u'i lo gzhug yar bcad la/ slob dpon pad ma 'byung gnas dang cog ro klu'i rgyal mtshan gnyis kyis gsang sngags kyi chos rgyud sde bco brgyad bsgyur/ /gsang sngags kyi chos sgrub pa la bar chad mi 'byung ba'i phyir gzi ldan 'bar ba mtshams kyi rgyud/ bdag tu 'dzin pa 'khor ba'i rgyu yin pas 'khor ba las sgrol zhing phung po lha'i dkyil 'khor du bya ba'i phyir zhi ba lha'i rgyud/ bdud dang mu stegs tshar gcad par bya ba'i phyir sku'i sgrub lugs bskal pa me ltar 'bar ba'i rgyud/ gsung gi sgrub rgyud lugs dbang chen 'dus pa'i tantra/ thugs kyi sgrub lugs khro bo kun dha ri ka'i tantra/ yon tan gyi sgrub lugs lha mo ma gol pa'i tantra/ 'phrin las kyi sgrub lugs rig 'dzin 'dus pa'i tantra/ rigs sngags kyi sgrub lugs he ru ka 'dus pa'i tantra/ 'jam dpal sku'i rgyud zla gsang nag po/ pad ma gsung gi rgyud rta mchog rol pa/ yang dag thugs kyi rgyud he ru ka gal po/ 'jig rten 'das pa'i mdo/ bdud rtsi yon tan gyi rgyud bdud rtsi rol pa che chung / phur pa 'phrin las kyi rgyud bi to ta ma la 'bum sde/ ma mo sbod gtong gi rgyud 'bum tig srid pa rgyud lung / phrin las kha skong ba dang rgyan rtags 'debs pa'i phyir shes pa stong khas brgyan pa'i rgyud/ las rgya mtsho ji ltar bstan pa'i rgyud/ karma ma le 'phrin las kyi rgyud/ bsod nams dang ye shes kyi tshogs rdzogs par bya ba'i phyir tshogs rgyud che chung / mchod pa mi zad pa'i gter du byin gyis brlab pa'i phyir nam mkha' mdzod byin gyis brlabs pa'i rgyud/ sgrol ba gnas su dag par bya ba'i phyir stobs chen yongs sgrol gyi rgyud/ sbyor ba gnas su dag par bya ba'i phyir thig le klong gi rgyud/ brtul zhugs drag por bya ba'i phyir glang po che rab 'bog gi rgyud/ bkra shis pa la sbyin bsregs bya ba'i phyir za byed rol ba'i rgyud/ gtor ma'i las thams cad kyi sngon du 'gro ba'i phyir gtor rgyud che chung / bka' 'khor skyong ba'i srung ma lhag