dgongs pa dang / nub mo sgra sgyur gyi khang par ka ma la shI la mu stegs kyis gshed ma btang bas gzim lam du mkhal ma mnyes nas bkrongs kyang zer te/ de ni g.yog po gser gnyer ba rgya gar dha na shrI bya bas bsad pa yin no/ /de'i skabs la ye shes dbang pos 'bras chan gsol nas/ de phyin chad khams kyi zas spangs nas ting nge 'dzin gyi zas dang brje bar bya'o gsungs nas grongs pa'i dus su nam mkha' las sgra dang 'od byung / gdung khang has po ri'i rtser brtsigs na legs bya ba'i sgra byung ngo / /thams cad gdung ba'i skad bton/ ye shes dbang po'i bu mo byang chub sems dpa' spyan ras gzigs kyi sprul pa zhig gis pha'i mchod rten brtsig pa'i sa klus bstan/ mchod rten de la lha mo gsum gyis skor ba gyis zer ba dang / btsan po'i zhal nas bo dhi sa twa'i gsung dang sbyar na/ kho bo tshe yun ring po mi thub gsungs nas rje thugs las chung ba las gzhol bar bzhed nas sgom mdzad par dgongs nas sras mu ne btsan po/ mu tig btsan po/ gcung khri lde btsan dang gsum mnga' ba las/ sras mu ne btsan po la chab srid 'bogs par bzhed de/ blon po zhang bu ri btsan la bsko bar dgongs pas rgyal po yab sras dang / blon po zhang rgya tsha lha snang / bu 'u ring btsan pa dang / rgyal blon gsum dbu rtse'i bar khang gi rnga khang na 'tshogs pa yum me tog sgrol gyis mthong nas/ thugs gtum pas dogs 'tshal nas chab srid sna nam pa la ster nges snyam/ mu tig btsan po la smrar bcug lha sras kyis 'u ring sgo bar du btsir nas chu gris bkum/ yab na re/ 'u ring gar song gsungs pas/ 'u ring rgyang ring por song zer nas gri khrag can bor nas bar khang du bros/ der rje'i thugs dam yang 'gyangs nas g.yar mchu byung dogs te/ blon po mdzangs pa kun gros byas nas blon po 'gos dpal 'gar gung btsan bya ba blon po 'gos kyis zhal lce dga' gsum du bcad/ chad srid mu ne btsan po la mnga' bar gyis/ thun tshags su dkar dmar mdzad nas gtad/ sna nam pa dga' bar stong bcal/ lha sras la mi sha mi blang bar byas nas/ yab zung mkhar du sgom du gshegs/ btsan pos bka' gtsigs kyi yi ge gsum mdzad nas gcig lha sa na yod/ gcig khams su khyer/ gcig rje'i phyag sbal na mchis te/ bse'i sgrom bur bcug kha la sgo lcags brgyabs nas gnod sbyin rgya dam nag po la gtad/ che long gcig zhang blon rnams la yang dar bar byas so/ /dbang phyug phun sum tshogs pa'i mnga' bdag rgyal po chen po khri srong lde btsan gyis/ grong khyer thams cad du gtsug lag khang dang gnas gzhi btsugs/ dben sa ru sgrub khang byas/ lcags ri brgya rtsa brgyad kyi mchod rten gyis bskor/ mi thams cad tshogs gsog pa dang / bsnyen gnas kyi sdom pa la bkod/ spyod lam thams cad chos spyod/ lugs thams cad chos lugs/ so nam thams cad chos dang mthun par byed du bcug bod 'bangs thams cad bde skyid la sbyar/ sems can thams cad bde ba la bkod nas/ rtags dang yon tan bsam gyis mi khyab pa byung ste/ drug cu rtsa drug la dgung la gshegs nas/ mchad pa yar lung sgyer pa sar bang so'i khrod du brtsigs nas lha mi la sbyin gtong rgya chen byas so/ /de nas mu ne btsan po dgung lo nyi shu rtsa lnga lon tsa na/ jo mo ru yongs bza' rgyal mo khab tu bzhes te rgyal srid gtad