chos kyi blon po bgyis te/ mes kyi bad rngam pa'i lha khang la dpe bgyis te/ thugs dam gyi gtsug lag khang bzhengs pa'i dus su/ rgyal po de'i sku ring la/ gra shod gnyis bya ba yi ge'i mkhan po gnyis byung ste/ rje la yi ge'i stangs phul bas/ seng ge gnam mchongs 'dra ba dang / mu tig bstar la rgyus pa 'dra ba gcig byung ste/ rje sa bdag rgyal po'i thugs dam 'bri bar bzang bas/ zha'i gtsigs kyi rdo ring gi 'gram du yi ge'i dpe gcig btab nas bzhag gser yig ni dge rgyas bye ma gling gi bzang po spyod pa dang / yer pa'i phung po gsum pa'i mdo/ mdo sna bzhugs pa'i gser 'bum de rnams 'bri ba'i dus su rjes rtsis gnang ba ni/ bsu ba zhu rten/ gdan g.yas gral/ gtang rag gi 'bul ba bsam gyis mi khyab pa gnang / rtsi sar zhing dor gcig skyo rogs su rtsed 'jo sna tshogs pa gnang ngo / /bod yul du gsung rab mang du bris shig ces bka' bstsal to/ /de nas rje'i zhal nas yab mes kun gyi ring la btsan po la bya ba gsum yod de/ thugs dam gyi gtsug lag khang bzhengs pa dang / bod 'bangs bde ba la bkod pa dang / sku'i dgra la dmag drangs pa'o/ /gong ma rnams kyis la las re re tsam mdzad/ la las gnyis gnyis tsam mdzad/ yang rim pas mdzad de/ ngas gsum dus gcig tu byed do/ /zhes bka' bstsal nas/ thugs dam gyi gtsug lag khang gi rmang 'ding bar byed tsa na/ rje'i zhal nas/ lha sa mkhar dang 'dra/ bsam yas grod dang 'dra/ skar chung mchad pa dang 'dra/ nga lha khang gsha' ma zhig byed gsungs nas bka' bstsal pa dang / rgya dkar po/ nag po/ li yul/ kha che/ bal po/ bod yul gyi bzo bo mkhas pa thams cad bkug ste/ rgya nag gi ju zhag mkhas pa zhig gis sa btsal/ 'on kyang rdo'i bzo bo mkhas pa zhig li'i yul du lcang ra smug po na li rje la yod pa thos nas/ gla ba gcig bzung nas lcags kyi dra bar bcug nas/ bod kyi btsan po'i spos kyi glang po yin pas 'di bzhes la li yul spyod pa'i rgyal po zhes bya ba bzo bo mkhas pa gcig yod zer bas/ de bod kyi btsan po'i thugs dam lha khang gi bzo bo byed pa la gnang bar zhu bya ba dang / de ma gnang na rgyal po thugs khros nas dmag 'dren no bya ba'i bka' shog gi sgrom bu bskur nas pho nya ba btang / pho nya bas li rje la bka' shog gi sgrog bu phul bas/ li rjes bka' shog gi sgrom bu gzigs pas spos kyi glang po'i ril ma tshur bcad/ spos kyi dri snom pa byung bas zhu rten la yang mnyes/ btsan po'i bka' la ma nyan na/ dmag yong ba la yang 'jigs nas/ bka' shog sgrom bu na ji ltar yod pa bzhin brdzang bar chad nas/ li yul spyod pa'i rgyal po la bod yul du mchi 'tshal bar bsgo bas/ ngos rgas pas nga'i bu gsum btsan po'i phyag tu 'bul lo zhes pas/ li rje na re/ khyod dang btsan po g.yar ma mjal na/ li yul du btsan po'i dmag yong bas/ sngon yang rgyal po srong btsan sgam po'i rta dmag drangs nas li yul phung / cham la phab zer bas khyod li yul spyod pa'i rgyal po lam du gum yang mgo bo btsan po'i phyag tu phul zhing / bu l-i gser gzungs/ gser 'od/ gser thog gsum ni lha bzo ba'i mkhas pa'i mchog yin pas bod du bzo byed du rdzongs/ pho nya ba la skyes bskur nas 'ongs/ zhes smras/ der li yul spyod pa'i rgyal po yang ma gum par btsan po dang zhal mjal te/