rgyal po mnyes so/ /de nas 'dzam bu'i gling na rdo bzo la mkhas pa'i bal po rdo mkhan la sogs pas bzo bgyis te/ 'og khang gsum sgo re bzhi man chad rdo la byas pa'i rdo khyad par 'phags pa byung ste/ de'i phud la ra sa'i gtsug lag khang du/ mes kyis chos kyi srol btod pas bka' drin che bas rdo ring phul lo/ /ri mo'i phud du dar la bris pa'i ma dpe 'bum brgya rtsa brgyad phul/ lder tsho'i phud la lha tshangs pa dang / brgya byin gnyis bzhengs nas phul lo/ /lugs ma'i phud la cong chen po dril bu'i tshul du btags nas phul/ bar khang lha khang gsum po so phag las byas/ steng lha khang gsum shing dang ko ba dang zangs ma la byas/ rgya phibs kyi 'og tu rlung gi 'khor lo bskor te/ rab tu byung ba mang po skor ba rgyun du byed do/ /bya 'dab la phyogs bzhir lcags thag bzhi mchod rten chen po bzhi la brtod/ rlung chen po nub nas byung ba'i tshe/ shar gyi lcags thag lhod tsam song ba dang / rgya phibs shar du yo tsam 'gro/ rlung shar nas g.yo tsa na/ nub kyi lcags thag lhod tsam song bas/ rgya phibs cung zad nub tu yo tsam 'gro/ ri nag gi rtse la na bun byung ba dang / lha khang gi khyung mgo la yang na bun thul le yong ba'i mthon po zhig ngan song sbyong ba'i dkyil 'khor du bzhengs su gsol lo/ /bya 'dab dgu brtsegs la sogs pa yab mes kun gyi lha khang las lhag pa/ bzo sna bcu gnyis kyis khyad par 'phags pa/ ngo mtshar du gyur pas sna drangs pa'i 'gur mo dang / gang ngar dang / btsan thang dang / nyang ro/ rtsibs kyi lha khang khrab sgo can gyis kha bskangs nas bzhengs so/ /de dag gi dge bsgos su 'os pa rnams la gnyer bsgos nas/ bsnyen bkur dang gnang sbyin che thang du mdzad/ btsun mo rnams la srid byung ba chu sman gyis khyer nas/ sras rgyal bu mi mnga' yang / 'bangs bde ba la bkod pa/ zas dang gos tsam gyi bde ba ni 'phral gyi bde bar gsal/ dus yun gyi bde ba ni lha chos la bkod pa'i phyir/ bde bar gshegs pa'i bka' gsung rab thams cad gzigs pas/ chos pa la la ni rgya dkar po'i skad/ la la ni rgya nag po'i skad/ la la ni bal po'i skad/ la la ni o rgyan gyi skad chos smra ba/ mes kyi lha dang chos skad sna tshogs su 'byung ba 'di slob dka' bas ma legs pas/ sangs rgyas rgya gar du byon nas chos rgya gar du gsungs pa yin pas/ da yang rgya gar gyi skad du/ gzhan gyi skad rigs kun bsgyur nas rgya gar gyi skad yug gcig tu 'gyur ba byed ces bka' bstsal nas/ bod phrug blo rno ba sum cu tham pa la gser mang po brdzangs nas/ rgya gar du lo tsA slob tu btang bas la la sgra ma shes/ la la tshad pas gum ste don ma 'grub po/ de nas btsan po/ khri srong lde btsan sku tshe'i smad la byon pa 'bro ka ba dpag brtsegs/ cog ro klu'i rgyal mtshan/ sna nam gyi ye shes sde gsum la bka' bstsal nas 'gyur skyon thams cad bsal te/ ma 'gyur ba dang / ma grags pa gnyis/ 'gyur chad pa dang lhag pa gnyis/ 'gyur log pa dang 'gyur 'khrugs pa gnyis/ 'gyur dman dang 'gyur gcong gnyis te/ 'gyur skyod brgyad kyi cha cung zad kyang med par byas nas 'gyur thams cad dag par byas/ rgya gar nyi 'og gi mkhan po atsarya/ kha che'i paNDi ta dzi na mi tra dang / su ren dra bo dhi dang / bIrya ka ra pra