[A:112a]bcom ldan 'das de ni mi snang bar gyur nas mtshan mo 'das pa'i tshe ting nge 'dzin de las bzhengs te/ dpal ldan bla ma bdag nyid chen po des kyang rnam pa thams cad du der dka' ba mdzad cing skal ba dang ldan pa'i dpal ldan dpal 'dzin la rang gi rtogs pa nye bar bstan no/ /dpal ldan bla ma mchog tu thugs rje can des kyang rnam pa thams cad du snod dang ldan par rtogs nas paNDYi ta chen po 'od byed lha la bka' drin mdzad do/ /des kyang paNDYi ta chen po rgyal po'i bla ma snyigs dus kyi thams cad mkhyen pa chos 'byung zhi ba la bshad pas/ kha na ma tho ba med pa'i thugs rje chen po la sogs pa'i yon tan brjod du med pa'i rin chen 'byung gnas/ dpal ldan bla ma de las kyang dpal ldan bla ma'i zhabs bsten pa la mkhas pa nyi ma dpal bdag gis de kho na nyid yang dag par thob bo zhes nyi ma dpal gyis bshad do/ /mtshan brjod dang rnal 'byor yan lag drug pa'i brgyud pa'o/ /dpal 'dzin 'di tshong dpon gyi bu yin/ gshin rje gshed kyi rnal 'byor pa dpal 'dzin du grags pa ni bram ze'i bu/ 'dis bskyed pa'i rim pa bsgoms pa na ma he'i gdong brnyan mngon du rgyur 'byung zhes grag la la ta ni gshin rje gshed kyi rnal 'byor pa des u rgyan nas rtog pa bdun pa/ rtog pa gsum pa spyan drangs kyang zer/ 'jigs byed kyi chos sde du ma mdzad/ de'i slob ma a mo gha'o/ /'phros so/ /da ni tsi lu pa'i slob ma slob dpon las kyi rdo rje yin la/ de'i lo rgyus ni/ rje rigs mi pham rdo rje bza' mi la bu med nas slob dpon tsi lu pa la gsol ba btab pas bu byung / ming skyed 'phel du btags/ lo bcu gnyis lon pa dang a mra'i ldum rar phyin/ rje rigs kyi bu mo zhig chung mar len du 'cha' ba na/ nam mkha' nas sprin sngon po'i gseb nas skyed 'phel khyod khyim pa'i rigs ma yin gyi rab tu byung ste phyag na rdo rje sgrubs shig ces byung ngo / /der khyim nas byung ste phyag na rdo rje'i gdam ngag su la yod dris pas/ sngar gyi slob dpon la yod par shes te gser gyi sor gdub cig phul nas zhus pas/ dbang rtags su shing shri Sha'i rdo rje zhig stsal/ rgyud dang gdam ngag rdzogs par gnang / sA la chen po'i phug tu bsgoms pas lo gcig na zhal mthong / de nas lo gcig