[A:113a]na chos bshad/ de nas lo gcig na dbang bskur bas nus pa shin tu che bar gyur/ sngar gyi slob dpon la dus 'khor bde dgyes sogs gsan/ nA ro pa spyod pa la 'byon kha ma la bdag med ma'i sgrub thabs gsan/ dbang zhus dus kyi ming ni ku su lu badzwa pA Ni zer/ de nas spyod pa byas pas sngar gyi rdo rje de bzung bas/ des gos ster/ gcan gzan dang dmag dpung thams cad bzlog smyon pa rnams la brgyab pas gsos/ de ltar las thams cad rdo rjes mdzad pas las kyi rdo rjer grags/ nags khrod du bzhugs rgyal po'i btsun mo bkug nas phyag rgya ma byas pas bla ma nags khrod pa'ang zer/ des bla ma thang lo pa bya ba bram ze'i rnal 'byor pa thang shing gi steng du lo gsum bsgoms pas phyag na rdo rje grub pa thob pa zhig la/ des rigs ngan gyi rnal 'byor pa shing pa la sha'i lo mas mdoms dkris byas pa'i gcer bu pa dpal sgyu ma chen po'i grub pa brnyes pa la/ des yul dbus bhe ra ba ra de'i rje btsun karNa ri pa bya ba la gnang ste 'dis zhal gzigs 'dis rang gi sring mo'i bu rje btsun ba la tsandra la'o/ /zhes glan lo tsA bas bris pas/ bdag rang gi bka' babs bzhi par 'dug pa po rje btsun ras chung pa yin/ mar pa/ mi la/ rngog la sogs pa'i yi ge la de dag ming tsam yang mi snang / rje btsun 'jug pa phyag na rdo rje yi dam mthil du song bas rje btsun khong rang gi dbang du mdzad pa la/ lo gsum gling rnams kyis man ngag bsre 'pho'i brgyud pa dang bsres/ karNa ri pa rdo rje dril bu pa'o gsungs nas/ de'i lo rgyus 'chad/ de man rnams kyis dpyad pa ma mdzad par bzhag de'i dbang gis kho bos de dag gi yi ger byin rlabs kyi brgyud pa la mos pa gtso bsam nas de khar bzhag pa yin/ gzhan dpyad na 'di dag phyag rdor kho na'i brgyud pa'o/ /des na 'di dang sngar bshad pa ma mthun pa ma dpyad pa dang dpyad pa byas pa'i khyad du shes dgos so// // ! da ni rdo rje theg pa des 'dul bar byed pa la 'dzam bu'i gling na 'gran zla med pa mtshan nyi zla ltar grags pa tilli pa yin pas de'i lo rgyus ni 'dul bya dman pa dang mthun par bstan nas lam sbyong tshul/ bar ma dang bstun nas sprul pa'i skur bstan tshul/ mchog dang mthun par rdzogs pa'i sangs rgyas rang du bstan tshul lo/ /dang po ni/ yul shar phyogs dza go yab bram ze gsal pa/ yum bram ze mo gsal ldan/ sring mo gsal sgron/ ming po gsal 'od ces bya bar 'khrungs te/ gces par bskyed bsrings/ der byis pa tshan gcig dang lhan cig ba lang skyong zhing rtse'o/ /slob dpon 'phags pa klu sgrub bha rendra'i nags 'dab na bum pa bzang po sgrub cing bzhugs/ de las