[A:118a]'brel 'byung yan lag ma shes pas/ /til mar snying po 'byin par mi nus bzhin/ /til brdungs phub ma bsal bar gyur pa las/ /til mar snying po 'byung ba de bzhin du/ /bla mas bstan pa de bzhin nyid kyi don/ /til mar bzhin du 'jug pa bsal bar bya/ /yul rnams dbyer med ngo bo gcig tu gyur/ /kye ho ring du 'gro 'dod gting dpag dka' ba'i don/ /da lta nyid du gsal ba ngo mtshar che/ /zhes gsungs pa'i sgra de thos pa tsam gyis rgyud byin gyis brlabs te skad cig la mkha' spyod du song bas yul de lan gcig stongs par gyur/ de nas mtshan tilli pa zhes grags so/ /de yang / ngas ni zhing khams brgyar yang phyin/ /sprul pa brgya phrag brgya yang bstan/ /zhes gsungs so/ /de nas nub phyogs u rgyan dang nye ba na rgyal po ma la gus pas ma'i ngag mi gcog pa zhig yod pa des ma la khyod ci la dga' ba byed byas pas/ de lta na paNDYi ta dang ku su lu pa kun bsags nas tshogs kyi 'khor lo byas na dga' zer/ nga ma'i ched du tshogs kyi 'khor lo bgyid pas paNDYi ta dang rnal 'byor pa thams cad 'dus shig ces bsgo ba na/ thams cad 'tshogs te rang rang gi 'dod pa'i lha mnyes par bya ba'i rim pa la zhugs so/ /der de dag gis rnal 'byor pa gang nus pa che ba zhig gis tshogs dpon byed par kha 'cham nas nus pa bltas pas/ rnal 'byor pa ma ti zhes bya ba zhig nus pa che nas/ de dpon du bkod de gral rim gyis 'dug pa'i skabs/ rgan mo mi sdug pa'i mtshan bco brgyad yod pa zhig gis nga nang du thong zer btang bas/ de na re khyod kyis tshogs dpon mi 'ong / sus 'ong byas pas/ nga'i ming pos 'ong zer/ ga na yod/ dur khrod na'o/ /bos shig byas pas/ gar song mi snang ste/ dum cig na rnal 'byor pa zhig khrid nas byung ngo / /der sngar gyi rnal 'byor pas 'o kol nus pa 'gran gyi/ gang che bas dpon gyis shig de ltar bya'o zhes zhal gyis bzhes te/ gnyis po stan gcig la 'dug nas/ dang por des dal lha dang bcas pa zhig nam mkha' la bzhengs byung ba te los bshig te los bzhengs pa khos bshig khos sprul pa bkye nas dur khrod kyi ro mang po blangs te byung bas te los med par byas/ te los de ltar byas pa khos med par btang / te lo pas sengge la zhon/