[A:༥༦ན]པ་ཆེན་པོས་སྟོན་པ་ཡང་ལོ་དགུ་བསྟེན། ར་སྒྲེང་གི་གདན་ས་ལོ་བཅུ་གཉིས་མཛད་པའི་རིང་། དགོན་པ་གོང་ནས་ཕྱིར་བྱོན། ད་ལྟ་དབུ་རྩེ་ཀ་བ་བཅུ་དྲུག་མའི་ས་དེར་གཟིམ་ཆུང་མཛད། དེ་དུས་ཞང་ཕྲེང་ཁ་ཟེར་ཆུང་གི་སྲས་དགྲ་བཅོམ། དེའི་སྲས་བེར་བརྒྱུད་དར་མ་ཡེ་ཤེས་ཀྱིས་ཀ་གཉིས་མའི་ཁྱམས་རྨད། ཁྱམས་ཆུང་། ནག་ཚང་གསུམ་མཛད་དེ་རབ་གནས་རྣལ་འབྱོར་པ་ཆེན་པོས་མཛད། གྲྭ་ས་མང་དུ་བཙུགས། གདུལ་བྱ་དུ་མ་སྨིན་པར་མཛད་དེ་དགེ་འདུན་སམ་བརྒྱ་ཙམ་འདུས། དྲུག་ཅུ་རྩ་གཉིས་པ་འབྲུག་ལོ་རྒྱལ་ཟླའི་ཚེས་བརྒྱད་ལ་ར་སྒྲེང་ནས་གཤེགས། དཔེ་ལ་ལར། རྟ་ལོ་བ་ཡོས་ལ་གཤེགས་པས་བདུན་ཅུ་ཐམ་པ་བཞུགས་ཟེར་བ་ཡང་སྣང་ངོ་། །དེ་ནས་དཔལ་ལྡན་དགོན་པ་བ་གདན་སར་བསྐོས། སྟོན་པ་ཡང་ལོ་དགུ་བསྟེན་པ་རྣལ་འབྱོར་པ་དང་འདྲ། ར་སྒྲེང་གི་གདན་ས་ལོ་བཅུ་མཛད། དགོན་པ་གོང་དུ་བཞུགས་ནས། སྣེའུ་ཟུར་བ་ལ་སོགས་པའི་སློབ་མ་མང་དུ་སྨིན་པར་མཛད་དེ་དྲུག་ཅུ་རྩ་བདུན་པ་ཁྱི་ལོའི་མངོན་པར་བྱང་ཆུབ་པའི་ཉ་ལ་ར་སྒྲེང་དུ་གཤེགས། དགོན་པ་བ་ལ་སློབ་མ་མང་དུ་བྱོན་པའི་མཆོག བུ་ཆེན་བཅུ་ནི། ཀླུང་ཤོད་རུག་པའི་ཞང་ཀ་མ་བ་ཤེས་རབ་འོད། ཁ་རག་སྒོམ་ཆུང་། རོག་ཆོར་བུ་བ་སྨྲ་བའི་སེང་གེ མཐའ་བཞི་སྒོམ་པ། འཕན་ཡུལ་རྒྱལ་དུ་སྙན་སྣ་མོ་བ་དང་། འབྲི་གོ་ཏེ་ལུང་པ་ཚུལ་ཁྲིམས་སྐྱབས་གཉིས། དར་ཡུལ་དུ་ཆུ་སྒོམ་གཞོན་ནུ་སྙིང་པོ་དང་། ཚུལ་སྒོམ་ཡེ་ཤེས་རྒྱལ་མཚན་གཉིས། འཕན་ཡུལ་གཉའ་ར་སྨན་འཛར། འགར་འདུལ་འཛིན། སྤྲས་མཐོང་པ་སར་སྣེའུ་ཟུར་བ་རྣམས་སོ། །དེ་རྣམས་