[A:༦༡བ]དེའི་ཚེ་སུམ་རུག་བར་བྱོན་ནས། འདི་རྣམས་ཕལ་ཆེར་དགྲ་འདྲེས་རྩེར་བ་དང་། ལྟོ་དོན་དུ་གཉེར་བ་ཤ་སྟག་ཡིན། ཆོས་བྱ་བསམ་ནས་རབ་ཏུ་བྱུང་བ་ནི་ཁྱོད་དང་། ཞང་བཙུན་གཉིས་ཡིན། སྙིང་ནས་ཆོས་བྱེད་ན་ར་སྒྲེང་དུ་དེངས་ཟེར་ནས་ཡུམ་གྱིས་ཁྲིད་ནས། དགུང་ལོ་ཉེར་དྲུག་ལ་འབྲོམ་སྟོན་པ་དང་མཇལ། སྤྱན་སྔའི་ཞལ་ནས། ངའི་མ་རང་བཞིན་གྱི་རྣལ་འབྱོར་མ་ཡིན་པས་འདིར་བསྐྱལ་བ་ཡིན་གསུངས། རྒྱ་གར་དུ་འགྲོ་བའི་ཆོས་འདྲ་ཞུས་པས། སྟོན་པའི་ཞལ་ནས། ཁྱོད་རྡོ་རྗེ་གདན་དུ་མ་འགྲོ ངས་རྗེས་སུ་འཛིན་པ་ཡིན། ཚེས་གྲངས་འདི་ལ་ལམ་རིམ་གྱི་དབུ་འཛུགས་གསུངས་ཏེ་བྱོན། ཉི་མ་ཤར་བ་དང་འཛོམས་པས་རྟེན་འབྲེལ་བཟང་གསུངས་ཏེ། ལམ་རིམ་གྱིས་ཁྲིད་པས་ཇི་ལྟ་བ་བཞིན་ཐུགས་ལ་འཁྲུངས། སྐུ་མཆེད་གཞན་གཉིས་དང་ལྷན་ཅིག་གཞུང་གི་བཤད་པ་གསན། སྤྱན་སྔའི་ཞལ་ནས། ཟིན་ངེས་པ་རེ་ལའང་ལན་གསུམ་གསུམ་སྟོན་པའི་སྤྱན་སྔར་བསྐྱར་ནས་ཤོག་བུ་དམར་པོ་ལ་བྲིས་ཡོད་གསུངས། ནུབ་ཅིག་མནལ་ལམ་དུ་རྡོ་རྗེ་གདན་དུ་བྱོན་པ་རྨིས་ཏེ། ཇོ་བོ་ཤེས་རབ་དབང་ཕྱུག་བྱ་བ་རྡོ་རྗེ་གདན་ལ་ལན་གསུམ་སྐོར་བ་ཅིག་དང་། ལོ་རྒྱུས་རྣམས་ཞུ་ཐུབ་བྱས་པས་ཅིག་པར་བྱུང་། རྒྱ་གར་དུ་མི་ཐོན་པ་ལ་ལྟ་བར་འདུག་པས་དེའི་དམ་བཅའ་མ་གྲུབ་པའི་སྡིག་སྦྱོང་དུ། ངས་ཚ་ཚ་བསགས་ན་རི་དེའུ་ཙམ་འོང་བ་བཏབ་གསུངས། སྟོན་པ་ལོ་བདུན་ཚུལ་བཞིན་དུ་བསྟེན། གཟིམས་གཡོག་ཀྱང་མཛད། རྒྱུན་དུ་སྤྱན་སྔར་བཞུགས་པས་མཚན་ཡང་དེ་ལྟར་དུ་གྲགས། ཡོན་ཏན་ཐམས་ཅད་རྫོགས་པར་མཛད། དེ་དུས་སྟོན་པས་ཐེག་པ་ཆེན་པོ་གསང་སྔགས་ལ་