[A:61b]de'i tshe sum rug bar byon nas/ 'di rnams phal cher dgra 'dres rtser ba dang / lto don du gnyer ba sha stag yin/ chos bya bsam nas rab tu byung ba ni khyod dang / zhang btsun gnyis yin/ snying nas chos byed na ra sgreng du dengs zer nas yum gyis khrid nas/ dgung lo nyer drug la 'brom ston pa dang mjal/ spyan snga'i zhal nas/ nga'i ma rang bzhin gyi rnal 'byor ma yin pas 'dir bskyal ba yin gsungs/ rgya gar du 'gro ba'i chos 'dra zhus pas/ ston pa'i zhal nas/ khyod rdo rje gdan du ma 'gro ngas rjes su 'dzin pa yin/ tshes grangs 'di la lam rim gyi dbu 'dzugs gsungs te byon/ nyi ma shar ba dang 'dzoms pas rten 'brel bzang gsungs te/ lam rim gyis khrid pas ji lta ba bzhin thugs la 'khrungs/ sku mched gzhan gnyis dang lhan cig gzhung gi bshad pa gsan/ spyan snga'i zhal nas/ zin nges pa re la'ang lan gsum gsum ston pa'i spyan sngar bskyar nas shog bu dmar po la bris yod gsungs/ nub cig mnal lam du rdo rje gdan du byon pa rmis te/ jo bo shes rab dbang phyug bya ba rdo rje gdan la lan gsum skor ba cig dang / lo rgyus rnams zhu thub byas pas cig par byung / rgya gar du mi thon pa la lta bar 'dug pas de'i dam bca' ma grub pa'i sdig sbyong du/ ngas tsha tsha bsags na ri de'u tsam 'ong ba btab gsungs/ ston pa lo bdun tshul bzhin du bsten/ gzims g.yog kyang mdzad/ rgyun du spyan sngar bzhugs pas mtshan yang de ltar du grags/ yon tan thams cad rdzogs par mdzad/ de dus ston pas theg pa chen po gsang sngags la