[A:༦༣ན]སློབ་མ་མང་པོ་བཅས་ཏེ་ཆོས་གསན་ཅིང་། མཁར་ལས་ཀྱི་གྲོགས་མཛད་པས་དགོན་པ་མྱུར་དུ་གྲུབ། དབུ་རྩེའི་རྒྱབ་ཏུ་སྒྲུབ་ཆུ་དང་། བཀྲིས་མཆེད་ལྔའི་བླ་ཡེའི་རབ་གནས་ལ་ན་ག་བྷོ་དྷི་དངོས་སུ་སྤྱན་དྲངས་ཚུལ་སོགས་ཀྱི་སྙན་གྲགས་ཀྱང་འབྱུང་ངོ་། །ལོར་ལོ་བརྒྱད་བཞུགས། དགེ་འདུན་བདུན་བརྒྱ་ཙམ་འདུས། ལོ་ནས་སྙུག་གྲུམ་དགོན་པར་འབྱོན་པའི་ལམ་དུ། ཕ་བོང་དཀར་ལེབ་བྱ་བའི་སྟེང་ནས་བྱ་ཡུལ་གྱི་རྒྱབ་རི་གཟིགས་པས། རི་དེ་རྒྱལ་བའི་གཙུག་ཏོར་འདྲ། །ཡན་ལག་བརྒྱད་ལྡན་ཆུ་བོ་འབབ། །དེ་ཡི་ཤར་ལྷོ་ཕྱོགས་མཚམས་ན། །ཚེ་དང་ལྡན་པའི་དགོན་གནས་ཡོད། །རི་བྱ་ཡུལ་ཕ་གིའི་ཐད་དུ་གཙུག་ལགས་ཁང་བཞེངས་ནས་སེམས་ཅན་ལ་ཕན་པ་རྒྱ་ཆེན་པོ་གྱིས། ཞེས་ལུང་བསྟན། དེར་ཞབས་རྗེས་ཀྱང་བྱོན། དེ་ནས་སྙུག་གྲུམ་དུ་ལོ་གསུམ་བཞུགས་བླ་མ་དང་ཡི་དམ་མང་པོ་ཞལ་གཟིགས། ང་ནི་ཚོགས་ཡོངས་སུ་རྫོགས་པའི་གང་ཟག་ཡིན། ངའི་རྡོ་རྗེའི་གདན་འདི་ཡིན་གསུངས་སོ། །གཙང་པ་རིན་པོ་ཆེའི་ཞལ་ནས། བར་དོར་མཆོག་གི་དངོས་གྲུབ་བརྙེས་པའི་གསུངས་ཡིན་གསུངས་སོ། །དགུང་ལོ་དོན་གཅིག་བཞེས་པ། ལུག་ལོའི་སྨིན་དྲུག་ཟླ་བའི་ཉེར་གཉིས་སྙུག་གྲུམ་དུ་གཤེགས། འདི་ལ་སློབ་མའི་མཆོག་བསྒོམ་བཞི། འགྲན་གྱི་དོ་མེད་གསུམ་ལ་སོགས་པ་བཀའ་གདམས་གདམ་ངག་པའི་སྲོལ་འཛིན་བྱོན་ཚུལ་འོག་ཏུ་འཆད་དོ། །དེ་ཡང་སྐུ་མཆེད་གསུམ་པོ་འདི་ཁོང་རང་གསུམ་གྱི་གསུང་ལྟར་ན་གནས་བརྟན་ཆེན་པོ་བཅུ་དྲུག་གི་རྣམ་འཕྲུལ་དུ་བྱེད། རིགས་གསུམ་མགོན་པོའི་སྤྲུལ་པར་བྱེད་པ་ནི། ལམ་ཡིག་ལས།