[A:༨༥ན]མ་བོ་ཐང་བ་ལ་བཀའ་གདམས་ཀྱི་ཆོས་སྐོར་དང་། པུ་གུ་དོར་ས་ཆེན་གྱི་སློབ་མ་གཤེན་རྡོ་རྗེ་སེང་གེ་ལ་ས་སྐྱ་པའི་ཆོས་སྐོར་གསན། བཅུ་དགུ་ལ་གེམ་ཆུང་དུ་ཞང་བན་ལ་བསྙེན་རྫོགས་མཛད། དེ་ནས་སངས་རྒྱས་དབོན་བློ་མདའ་གྲོང་མོ་ཆེ་ན་སློབ་མ་མང་པོ་ལ་བཀའ་གདམས་ཀྱི་ཆོས་སྐོར་གསུང་བ་དང་མཇལ་བས་དད་དེ་ཉི་ཤུ་རྩ་བརྒྱད་ནས་རིན་ཆེན་སྒང་པའི་གྲྭ་པ་མཛད་ཡུལ་རིང་དུ་བསྟེན། བཀའ་གདམས་ཀྱི་ཆོས་རྫོགས་པར་གསན། དེ་ནས་བསམ་ཡས་ཕུའི་བཟང་མོ་དགོན་པ་བཏབ། བདུན་ཅུ་རྩ་བདུན་པ་ཆོ་འཕྲུལ་ཟླ་བའི་ཚེས་བཞི་ལ་བཟང་མོ་དགོན་པར་གཤེགས། ཁོང་གི་སློབ་མ་ཇོ་གདན་ལྷས་ཕུ་བས། ལྷས་ཕུ་དགོན་གསལ་དང་། ལྷ་དགེ་འདུན་སྒང་པས་དགེ་འདུན་སྒང་བཏབ། གཞན་ཡང་འཕན་ཡུལ་ཟོང་དགོན་པ་སོགས་བྱུང་། ནགས་མོ་བས། བྱོན་གྱི་ནགས་མོ་དགོན་པ་བཏབ། ཟུང་ཆུ་མོ་པས་འཕན་ཡུལ་མདའི་ཟུང་ཆུར་དགོན་པ་བཏབ་ཏེ། ཕྱིས་སྤོས་པ་གྲབ་ཀྱི་སས་ཁང་ཡིན་ནོ། གོང་དུ་སྨོས་པ་སྣེའུ་ཟུར་པ་ལས་འཕེལ་ཚུལ་ནི། སྣེའུ་ཟུར་པ། གདུང་རུས་བཙོས་པོ། སྤྲས་མཐོང་པ་སར་བྱ་ལོ་ལ་འཁྲུངས། བྱིས་པའི་དུས་ནས་ཏིང་ངེ་འཛིན་རང་འཁྲུངས་སུ་མངའ། རབ་ཏུ་བྱུང་ནས་མཚན་ཡེ་ཤེས་འབར་དུ་བཏགས། དགོན་པ་བ་སྐུ་མཆེད་གསུམ་ལ་སོགས་པ་བླ་མ་མང་དུ་བསྟེན། དགོན་པ་བ་དང་ཐོག་མར་མཇལ་བའི་དུས། ཐུགས་ཁ་ནས་ཐུབ་པའི་སྐུ་འོད་འཕྲོ་བ་ཅིག་བྱོན་ནས་སྣེའུ་ཟུར་པ་ལ་ཐིམ་པས་ཏིང་ངེ་འཛིན་ཁྱད་པར་ཅན་སྐྱེས། བླ་མ་ལ་གུས་པ། བྱང་