[A:༨༤བ]དུ་བྱོན། དགེ་བཤེས་ཉང་རན་དང་། དགེ་བཤེས་ཁ་ཆེས་མཁན་སློབ་མཛད་དེ་བསྙེན་པར་རྫོགས། འཕན་ཡུལ་མདར་ཀ་བ་དར་སེང་ལ་འདུལ་བ་དང་། གཞན་ཡང་སྡེ་སྣོད་མང་དུ་གསན། །དེ་ནས་ལོ་བཅོ་བརྒྱད་ཀྱི་རིང་ལ་སྒྱེར་བསྒོམ་རང་བསྟེན་ནས་གསུང་རབ་མཐའ་དག་དང་། ལུང་མན་ངག་རྫོགས་པར་གསན། ཡི་དམ་ཆོས་སྐྱོང་དཔག་ཏུ་མེད་པ་ཞལ་གཟིགས། རྒྱ་མའི་དབུ་རྩེ་གསར་མ་བཞེངས་པ་དང་། རིན་ཆེན་སྒང་གི་གླིང་རྒྱ་བསྐྱེད་པ། ཕྱོགས་ཀྱི་གཙུག་ལག་ཁང་དང་། རྟེན་གསུམ་མང་པོའི་རབ་ཏུ་གནས་པ་སོགས་འགྲོ་དོན་རྒྱ་ཆེ་ཞིང་། སངས་རྒྱས་སྐལ་ལྡན་ཤིང་རྟ་ཞེས་པར་འགྱུར་བར་ཞལ་གྱིས་བཞེས། སྤྱན་རས་གཟིགས་ཀྱི་སྤྲུལ་པར་ཡང་གྲགས། རྒྱས་པར་དོན་དུ་གཉེར་ན། ཁུ་དཔོན་གྱི་རྣམ་ཐར་ཐུན་མོང་བ་ཆེ་བ་གཅིག་དང་། མཆོད་ཁང་བཞེངས་ཚུལ་བཀྲ་ཤིས་ལེབ་བརྒྱད་མ་བྱ་བ་ལྷོ་པ་དབུ་མ་པ་ཟེར་བའི་སློབ་མ་ཅིག་གི་བྱས་པ་དང་། རི་བོ་མཎྜལ་རྩེར་བྱོན་པའི་རྣམ་ཐར་རྣམས་སུ་གསལ་ལོ། །སློབ་མ་རྟོགས་ལྡན་བཟང་མོ་བ། ནགས་སྤོ་བ། ཟུང་ཆུ་སྤོ་པ། ནག་མོ་སང་ཡོན་དང་མོ་བཞིར་གྲགས་པ་རྣམས་སོ། གདན་སར་ལོ་བཞི་བཅུ་བཞུགས་ཏེ་བདུན་ཅུ་དོན་གཉིས་པ་སྨལ་པོ་ཟླ་བའི་ཚེས་བཞི་ལ་རྒྱ་མ་གནས་སུ་གཤེགས། རྟོགས་ལྡན་བཟང་མོ་བ་ནི། ཡུལ་དྭགས་པོ་བྲད་ལྷ་ས་བ། གདུང་རུས་སྤྱིལ། ཡབ་རྣལ་འབྱོར་ཇོ་སྟག་ལ་སྲས་གསུམ་ཡོད་པའི་འབྲིང་པོ། མཚན་གཞོན་ནུ་སེང་གེ་ཟེར། བྱིས་པའི་དུས་དྭགས་པོ་སྒམ་པོ་བ་ལ་ཕྱག་རྒྱ་བའི་ཁྲིད་འགའ་དང་། བྱ་ཡུལ་བའི་སློབ་