[A:༨༦བ]ཉན་གྱིས། བསྟན་པ་ལ་ཕན་པར་འགྱུར། ཞེས་ལུང་བསྟན་པས། གསང་ཕུ་ནེའུ་ཐོག་གི་ས་ཆ་གཟིགས་ཏེ། བླ་མས་ལུང་བསྟན་པའི་གནས་དེ་ཡིན་པར་མཁྱེན་ནས། གསང་ཕུ་ནེའུ་ཐོག་གི་གཙུག་ལག་ཁང་བཞེངས། བསྟན་པའི་བྱ་བ་མཛད་དེ། དང་པོར་དགེ་འདུན་ལྔ་བརྒྱ་ཙམ་འདུས་སོ། །དེ་ལས་འཕྲོས་པ་ལ་གཉིས། ལོ་ཙཱ་བ་བློ་ལྡན་ཤེས་རབ་ལས་སློབ་མ་འཕེལ་ཚུལ། མངའ་རིས་པ་ཤེས་རབ་རྒྱལ་མཚན་ལས་བཀའ་གདམས་གླེགས་བམ་བྱུང་ཚུལ་ལོ། །དང་པོ་ནི། ལེགས་ཤེའི་གཅུང་པོ་ཀླུང་ཁྲི། ཀླུ་བྱང་། ཆོས་སྐྱབས། ཐུབ་པ་བཞི་ལས། ཆོས་སྐྱབས་ཀྱི་སྲས་ལོ་ཙཱ་བ་བློ་ལྡན་ཤེས་རབ་ཡིན་ཏེ། དེའང་ལྕགས་མོ་ཕག་གི་ལོ་ལ་སྐུ་འཁྲུངས། སྐྱེས་བུ་དམ་པ་དེས་སྐུ་ན་གཞོན་ནུའི་དུས་ནས། ཁུ་བོ་དང་། བཀའ་ཆུའི་སློབ་ཆུང་ཚུལ་ཁྲིམས་ཤེས་རབ་ལ་སོགས་པ་བསྟེན་ནས་རབ་ཏུ་བྱུང་། རྒྱུད་སྦྱངས། དགུང་ལོ་བཅུ་བདུན་ལོན་པའི་དུས། མངའ་རིས་སྟོད་ཀྱི་ལྷ་བླ་མ་བྱང་ཆུབ་འོད་ཀྱི་དབོན་པོ་མངའ་བདག་རྩེ་ལྡེས། རྒྱ་གར་དུ་ལོ་ཙཱ་སློབ་པ་ལ་བརྫངས་ཏེ་ཡུལ་དབུས་དང་ཁ་ཆེ་ལ་སོགས་པར་བྱོན། པཎྜི་ཏ་པད་རྫ་ན་དང་། འབུམ་ཕྲག་གསུམ་པ། པ་ར་ཧེ་ད་མ་ཧཱ་ཛ་ན། སུ་མ་ཏི་ཀིརྟི་དང་། སྐལ་ལྡན་རྒྱལ་པོ་ལ་སོགས་པ་མཁས་གྲུབ་མང་དུ་བསྟེན། རྒྱ་བལ་དུ་ལོ་བཅུ་བདུན་བཞུགས་ནས། མངའ་རིས་སྟོད་དུ་ཕེབས། མངའ་བདག་དབང་ལྡེ་དང་། ཁྲི་བཀྲ་ཤིས་དབང་ཕྱུག་བཙན་གྱིས་འགྱུར་གྱི་སྦྱིན་བདག་མཛད་ནས། ཚད་མ་རྒྱན་ལ་སོགས་པ་བསྟན་བཅོས་མང་དུ་བསྒྱུར། དེ་ནས་དབུས་སུ་ཕེབས། ཁུ་བོའི་གདན་