[A:༨༨ན]ལོ་བཅོ་བརྒྱད་མཛད་ཅིང་། སློབ་མ་བུ་དགུར་གྲགས་པ་ནི། ཟད་རིང་། ཕུ་དར་དཀོན། གཙང་པ་གླུ་གུ་རྣམས་ལ་སྔ་ཚར་བ་གསུམ། འུ་ཡུག་པ་བསོད་ནམས་སེངྒེ། བོ་དོང་རིན་ཆེན་སེངྒེ། སློབ་དཔོན་འཛམ་ནམ་གསུམ་ལ་བར་ཚར་གསུམ། རྒྱ་འཕྲེང་། འཇམ་གསར། སྐྱེ་བ་ནག་གསུམ་ལ་ཕྱི་ཚར་གསུམ་ཟེར་རོ། །དེ་ལྟར་སློབ་མ་མང་ཡང་གདན་ས་རྒྱལ་བ་པོ་སྟོན་གྱིས་བྱས། དེ་ནས་རྒྱ་འཕྲེང་པ་བདེ་བ་ཅན་ནས་སྤྱན་དྲངས་ཏེ་གདན་ས་མཛད། དེ་ནས་ཆུ་མིག་པ་སེངྒེ་དཔལ་གྱིས་གདན་ས་ལོ་བཅོ་བརྒྱད་མཛད། དེ་ནས་ད་ལྟའི་བར་དུ་གདན་ས་མ་ཆད་པར་བྱོན་པའོ། །ལོ་ཙཱ་བའི་བུ་ཆེན་ཁྱུང་རིན་ཆེན་གྲགས་ཀྱི་སློབ་མ། སྟོད་ལུང་རྒྱ་དམར། སྟག་པ་ཁ་ཆེ་སོགས་ལས་བརྒྱུད་པ་ཉང་སྟོད་གནས་གསར་ལ་སོགས་སུ་དར་རོ། །འབྲེ་ཤེས་རབ་འབར་གྱི་ཉང་སྟོད་གནས་རྙིང་དུ་ཕར་ཕྱིན་གྱི་གྲྭ་ས་བཙུགས་ཏེ། ལས་སྟོད་པ་དཀོན་མཆོག་འབར་ལ་སོགས་པ་སྨིན་པར་མཛད་དོ། །ཨར་བྱང་ཆུབ་ཡེ་ཤེས་ཀྱིས་གནམ་རྩེང་ལྡིང་དང་། གཞུ་ཀུན་དགའ་ར་བ་སོགས་སུ་ཆོས་གསུངས་ཏེ། གྲྭ་པ་དཔེ་འགྲེམས་དུས་གཅིག་ལའང་བརྒྱད་བརྒྱ་ཙམ་འདུས། གྲགས་ཆེ་བ་དཀར་ཆུང་རིང་མོ་སོགས་མང་དུ་བྱོན་ནོ། །གཞན་ཡང་གཉལ་ཞིག་གི་སློབ་མ་ལས་བརྒྱུད་པའི་ས་སྐྱ། ཞ་ལུ་སོགས་གཙང་གི་ཆོས་སྡེ་གྲགས་ཆེ་བ་རྣམས་སུ་མཚན་ཉིད་ཀྱི་བཤད་གྲྭ་བཙུགས་ཏེ། མདོར་ན་རྔོག་ལོ་ཙཱ་བ་ཁུ་དབོན་ནས་བརྒྱུད་པ་རྣམས་ཨ་ཏི་ཤའི་སློབ་བརྒྱུད་ཀྱི་མཆོག་ཏུ་གཏོགས་ཤིང་། བསྟན་པ་སྤྱི་ལ་བཀའ་དྲིན་ཆེ་བས་ཟུར་ཙམ་