[A:88a]lo bco brgyad mdzad cing / slob ma bu dgur grags pa ni/ zad ring / phu dar dkon/ gtsang pa glu gu rnams la snga tshar ba gsum/ 'u yug pa bsod nams sengge/ bo dong rin chen sengge/ slob dpon 'dzam nam gsum la bar tshar gsum/ rgya 'phreng / 'jam gsar/ skye ba nag gsum la phyi tshar gsum zer ro/ /de ltar slob ma mang yang gdan sa rgyal ba po ston gyis byas/ de nas rgya 'phreng pa bde ba can nas spyan drangs te gdan sa mdzad/ de nas chu mig pa sengge dpal gyis gdan sa lo bco brgyad mdzad/ de nas da lta'i bar du gdan sa ma chad par byon pa'o/ /lo tsA ba'i bu chen khyung rin chen grags kyi slob ma/ stod lung rgya dmar/ stag pa kha che sogs las brgyud pa nyang stod gnas gsar la sogs su dar ro/ /'bre shes rab 'bar gyi nyang stod gnas rnying du phar phyin gyi grwa sa btsugs te/ las stod pa dkon mchog 'bar la sogs pa smin par mdzad do/ /ar byang chub ye shes kyis gnam rtseng lding dang / gzhu kun dga' ra ba sogs su chos gsungs te/ grwa pa dpe 'grems dus gcig la'ang brgyad brgya tsam 'dus/ grags che ba dkar chung ring mo sogs mang du byon no/ /gzhan yang gnyal zhig gi slob ma las brgyud pa'i sa skya/ zha lu sogs gtsang gi chos sde grags che ba rnams su mtshan nyid kyi bshad grwa btsugs te/ mdor na rngog lo tsA ba khu dbon nas brgyud pa rnams a ti sha'i slob brgyud kyi mchog tu gtogs shing / bstan pa spyi la bka' drin che bas zur tsam