[A:༩༡བ] ཁྱད་པར་དུ་ལོ་རྒྱུས་ཞིབ་པར་མཛད་དེ། མདོ་སྡེ་རྣམས་ལས། སངས་རྒྱས་ཀྱིས་ཡུལ་འདིར་གང་ཟག་འདི་ལ་ཆོས་འདི་གསུངས་བྱ་བ་ཡོད་པས། ཆོས་ཁུངས་བཙུན་པར་རྟོགས་པ་ལ་ལོ་རྒྱུས་འདི་གལ་ཆེ་བ་ཡིན་གསུངས་ནས་རྒྱས་བར་བྲིས། ཡི་གེ་དེ་ཐམས་ཅད་འདུལ་བ་འཛིན་པའི་ཕྱག་ཏུ་བྱུང་བས་ཁོང་གི་ཕྱོགས་གཅིག་ཏུ་བསྒྲིགས་པས། ཇོ་བོའི་ལམ་ཡིག་ཏུ་གྲགས། རྒྱ་ར་སྟོན་བརྗིད་ལ་སྔགས་ཀྱི་གདམས་པ་གཙོ་བོར་གནང་། འདིས་རྒྱ་རའི་དགོན་པ་བཏབ། གཞན་ཡང་། བ་སྤུ་བ་ཤེས་རབ་ཚུལ་ཁྲིམས་ཀྱིས་ཕྱག་སོར་བ་ཡུན་རིང་དུ་བསྟེན། ཇོ་བོ་ནས་བརྒྱུད་པའི་ཆོས་སྐོར། ཁྱད་པར་སྤྱན་རས་གཟིགས་ཀྱི་གདམས་ངག་ཐམས་ཅད་མ་ལུས་པར་གནང་། ལུང་བསྟན་ནས་ཐུགས་རྗེ་ཆེན་པོ་བསྒྲུབས་པས་ལོ་ལྔ་ན་ཞལ་མཐོང་། ཐེག་པ་ཆེན་པོ་སྦྱོར་ལམ་གྱི་རྟོགས་པ་བརྙེས་པ་ཡིན་གསུངས། བ་སྤུ་བས་འཕགས་གཅེས་སྒོམ་ཤེས་རབ་རྡོ་རྗེ་དང་། མངའ་རིས་པ་ཤེས་རབ་རྒྱལ་མཚན་གཉིས་ལ་གསུངས། དེ་གཉིས་ཚོགས་ལམ་ཆེན་པོ་བ་ཡིན་གསུངས། གཅེ་སྒོམ་གྱིས་ཐོག་མར་བྲག་ལྷ་ཀླུ་ཕུག་ཏུ་ལོ་བརྒྱད་སྒྲུབ་པ་མཛད་ནས། འཕགས་པའི་ཞལ་དངོས་སུ་མཐོང་ངོ་། །བླ་མ་མངའ་རིས་པ་ལ་རུ་མཚམས་ཀྱི་བྲག་ཕུག་ཏུ་བསྒྲུབས་པས་ཞལ་མཐོང་བར་འགྱུར་གསུངས་ནས་ལུང་བསྟན་ཏེ། བསྒྲུབས་པས་ལོ་བཞི་ན་ཞལ་མཐོང་། དུས་རྒྱུན་དུ་མི་མ་ཡིན་གྱིས་འཚོ་བ་དྲངས་གསུངས། དེ་གཉིས་ཀ་ལ་གྲུབ་ཐོབ་སྐྱེར་སྒང་པས་ཞུས་པས། ལོ་ཕྱེད་དང་བཞི་བསྒྲུབས་བས་ཞལ་མཐོང་ནས།