[A:༩༢བ]ཀྱང་། དོན་ས་རྒྱན་གཉིས་སུ་འདུ་བ་དང་། སྐྱེས་རབས་ཀྱིས་བཅོམ་ལྡན་འདས་ཀྱི་སྔོན་གྱི་མཛད་པ་ལས་བརྩམས་ཏེ། བྱང་ཆུབ་སེམས་དཔའི་སྤྱོད་པ། ཕ་རོལ་ཏུ་ཕྱིན་པ་དྲུག་དབྱེ་བ་དང་བཅས་པའི་དོན་ཉམས་སུ་ལེན་ཚུལ་གསུངས་པ་དང་། ཆེད་དུ་བརྗོད་པའི་ཚོམས་དགྲ་བཅོམ་པ་ཆོས་སྐྱབས་ཀྱིས་མཛད་པ། བརྗོད་བྱ་སྣ་ཚོགས་པ་ཚོམས་སུ་བསྡུས་ནས་གསུངས་པས། ཆོས་སྤྱི་ལ་གལ་ཆེ་བར་དགོངས་ཏེ་གཞུང་དྲུག་ཏུ་མཛད་དོ། །བཤེས་གཉེན་གོང་མ་རྣམས་འདུལ་སྤྱོད་གཉིས་ཞེས། འདུལ་བས་ལྷག་པ་ཚུལ་ཁྲིམས་ཀྱི་བསླབ་པ། སྤྱོད་འཇུག་གིས་བྱང་ཆུབ་སེམས་དཔའི་བསླབ་པ་གསུམ་ལ་སློབ་པ་སྟོན་པས་དེ་རྣམས་ཟབ་ལམ་རྡོ་རྗེ་ཐེག་པའི་རྟེན་དུ་ཡང་ངེས་པར་དགོས་པ་ལ་དགོངས་སོ། །གཞན་ཡང་ཇོ་བོའི་ཆོས་ཆུང་བརྒྱ་རྩར་གྲགས་པའམ། བྱང་ཆུབ་སེམས་དཔའི་སྤྱོད་པ་གཙོ་བོར་སྟོན་པས་སྤྱོད་ཕྱོགས་བརྒྱ་རྩ་ཞེས་པའི་གླེགས་བམ་ལ། ཐོག་མར་མཆོད་བརྗོད་ཀྱི་ཚུལ་གྱིས་བསྟོད་པའི་སྐོར་ལ། དཀོན་མཆོག་གསུམ་རྗེས་སུ་དྲན་པའི་མདོ། ལྷ་ལས་ཕུལ་བྱུང་བར་བསྟོད་པ་བདེ་བྱེད་བདག་པོས་མཛད་པ། བཤགས་པའི་བསྟོད་པ་ཙནྡྲ་གོ་མིས་མཛད་པ། ཡོན་ཏན་མཐའ་ཡས་པར་བསྟོད་པ་དཀོན་མཆོག་འབངས་ཀྱིས་མཛད་པ། དེའི་འགྲེལ་པ་དང་། དོན་བསྡུས་པའི་ཚིགས་བཅད་ཕྱོགས་ཀྱི་གླང་པོས་མཛད་པ་དང་དྲུག སྐྱབས་འགྲོའི་སྐོར་ལ། སྐྱབས་གསུམ་བདུན་ཅུ་པ་ཟླ་གྲགས་ཀྱིས་མཛད་པ། སྐྱབས་འགྲོ་དྲུག་བཅུ་པ་བི་མ་ལ་མི་ཏྲས་མཛད་པ།