[A:༢༠ན]མོ་ནམ་མཁའ་ལ་མེ་དཔུང་འབར་བའི་དབུས་ན་འདུག་པ་མཐོང་སྟེ་འགྱོད་ནས་བཤགས་པ་བྱས། རྗེས་སུ་གཟུང་བར་གསོལ་བ་བཏབ་པས། དེས་དབང་བསྐུར་བྱིན་གྱིས་བརླབས་པས་མོས་ཀྱང་དངོས་གྲུབ་ཐོབ་ནས་རྒྱལ་པོ་ལ་སྨྲས་པས། རྒྱལ་པོ་འཁོར་དང་བཅས་པ། སློབ་དཔོན་ལ་མཇལ་དུ་འོང་པ་ལ། ནམ་མཁར་བཞུགས་ནས་ཏིལ་མར་གྱི་དཔེས་མཚོན་པའི་ཆོས་ཟབ་མོ་གསུངས་པས། རྒྱལ་པོ་འཁོར་བཅས་དད་དེ་ཉམས་སུ་བླངས་པས་མཁའ་སྤྱོད་གྲུབ་སྟེ། རེ་ཞིག་ཡུལ་དེ་སྟོང་པ་ཙམ་དུ་གྱུར་ཏོ། །དེའི་སློབ་མ་ནཱ་རོ་པ་ནི། ཡབ་ཁ་ཆེ་བ་ཡིན་ལ། ཁ་ཅིག་རྒྱལ་རིགས་སུ་བཞེད་དེ། ཁུང་ཐུབ་ལས་བྲམ་ཟེའི་རིགས་སུ་གསུངས་པས་དེ་ལ་རིགས་དཀར་ནག་བརྒྱད་ཡོད་པའི་ནང་ནས། བཟང་ཤོས་ནཱ་རོ་ཏ་པ་ཞེས་བྱ་བའི་རིགས་ཡིན་ཞིང་། དེས་དང་པོར་སྒྲ་ལ་སོགས་པ་རིག་པའི་གནས་ཐམས་ཅད་ལ་སྦྱངས་པའི་མཁས་པ་ཆེན་པོར་གྱུར་ནས། ཕྱིས་སངས་རྒྱས་ཀྱི་བསྟན་པ་ལ་རབ་ཏུ་བྱུང་སྟེ། མཚན་ཛྙ་ན་སིདྡྷི་ཞེས་གྲགས་ལ། ནཱ་རོ་འགྲེལ་ཆེན་ལས། སྙན་གྲགས་བཟང་པོ་ཞེས་བཤད་དེ། མཚན་བརྒྱད་ཡོད་པའི་གཅིག་ཡིན་ནོ་ཞེས་བླ་མ་དག་གསུངས་སོ། །དེ་ནས་སྡེ་སྣོད་གསུམ་དང་རྒྱུད་སྟེ་བཞི་ལ་སྦྱངས་ཤིང་ཡོངས་རྫོགས་ཀྱི་པཎྜི་ཏར་གྱུར་ཏོ། །དེའི་ཚེ་དཔལ་ན་ལེནྡྲ་ན་མཁས་པ་སྒོ་དྲུག་ཏུ་གྲགས་པ་ཡོད་པའི། ཤར་སྒོར་ཤནྟིཔ། ལྷོ་སྒོར་ངག་དབང་གྲགས་པ། ནུབ་སྒོར་ཤེར་འབྱུང་བློ་གྲོས། དབུས་ན་ཛྙཱ་ན་མི་ཏྲ་དང་། རིན་ཆེན་རྡོ་རྗེ་གཉིས་ཡོད་ཅིང་། ནཱ་རོ་པ་བྱང་སྒོ་བར་གྲགས། དེས་ཐོས་བསམ་ཉན་བཤད་ཀྱིས་འགྲོ་བའི་དོན་