[A:༡༩བ]རྒྱལ་ཞབས་ལ། དེ་རྣམས་ཀྱི་རྣམ་ཐར་དོན་དུ་གཉེར་ན་ཁོ་བོས་བྱས་པའི་དཔལ་འཁོར་ལོ་བདེ་མཆོག་གི་ཆོས་འབྱུང་རྒྱས་བསྡུས་སོགས་སུ་བལྟ་བར་བྱའོ། །དེ་ནས་ཏེ་ལོ་པ་དང་། ནཱ་རོ་པ་རྣམས་ལས་བརྒྱུད་པ་ནི་རིང་བརྒྱུད་ཡིན་ལ། ཉེ་བརྒྱུད་ཀྱི་དབང་དུ་བྱས་ན། ཏེ་ལོ་པའི་རྣམ་ཐར་ནི། དེ་དང་པོ་རྒྱལ་རིགས་ལས་རབ་ཏུ་བྱུང་སྟེ། མཚན་ཤེས་རབ་བཟང་པོ་ཞེས་པར་བཏགས། རིག་པའི་གནས་རྣམས་ལ་སྦྱངས་པས་མཁས་པ་ཆེན་པོར་གྱུར་ནས། བླ་མ་རྣམ་རྒྱལ་ཞབས་ལ་གཏུགས། དཔལ་འཁོར་ལོ་སྡོམ་པའི་དཀྱིལ་འཁོར་དུ་དབང་བསྐུར། རྒྱུ་མན་ངག་དང་བཅས་པ་ཞུས། དེར་བླ་མས་ལུང་བསྟན་ཏེ་ཤར་ཕྱོགས་བྷཾ་ག་ལའི་རྒྱུད། ཧ་རི་ཀེ་ལ་ཞེས་བྱ་བ་ཟ་ཧོར་གྱི་གྲོང་ཁྱེར་དེ་ན་སྤྲུལ་པའི་རྒྱལ་པོ་ཨུཏྨ་སྐྱེས་པ་ཞེས་བྱ་བས་བྱིན་གྱིས་བརླབས་པའི་སྒྲུབ་ཐག་ཉེ་བའི་གནས་ཡོད། དེ་ན་པཉྩ་པ་ཏ་ན་ཞེས་བྱ་བའི་ཚོང་འདུས་ན་སྨད་འཚོང་མ་ཏིལ་རྡུང་བ་ཞིག་ཡོད་ཀྱིས། དེའི་གཡོག་གྱིས་ལ་རྟོགས་པ་སྦྱོངས་ཤིག་ཅེས་ལུང་བསྟན་པ་དེར་བྱོན་ཏེ། སྨད་འཚོང་མའི་གཡོག་བྱས་པས། མོས་ཏིལ་བརྡུང་དུ་བཅུག་ཏེ། སློབ་དཔོན་གྱིས་ཏིལ་བརྡུངས་ཤིང་ཉམས་སུ་བླངས་པས། ཏིལ་ལ་མར་གནས་ཀྱང་རྡུང་བ་དང་བཙིར་བ་མ་བྱས་ན་མངོན་དུ་མི་འགྱུར། དེ་བཞིན་དུ་རང་སེམས་སངས་རྒྱས་གནས་ཀྱང་ཉམས་ལེན་མ་བྱས་ན་མངོན་དུ་མི་འགྱུར་བར་དགོངས་ཏེ་ཉམས་སུ་བླངས་པས་དེ་ཁོ་ན་ཉིད་མངོན་སུམ་དུ་གྱུར་པའི་རྟོགས་པ་སྐྱེས་ཏེ། རྡོ་རྗེ་འཆང་གི་མངོན་སུམ་དུ་དབང་བསྐུར་བྱིན་གྱིས་བརླབས་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་བོ། །དེར་སྨད་འཚོང་མས་ཁོང་མཚན་