[A:༢༨ན]བོད་ཀྱི་མི་རྣམས་བྱུང་ཚུལ་དང་། བསྟན་པ་སྔ་དར་གྱི་དུས་སུ་དམ་པའི་ཆོས་འཕེལ་འགྲིབ་བྱུང་བའི་ཚུལ་རྣམས་ཅུང་ཟད་བཤད་ན། དེ་ཡང་བོད་ཀྱི་མི་རྣམས། བཀའ་ཆེམས་ཀ་བཀོལ་མ་ལས། སྤྲེའུ་དང་བྲག་སྲིན་གྱི་རྒྱུད་དུ་བཤད། ལྷ་ལས་ཕུལ་དུ་བྱུང་བའི་བསྟོད་འགྲེལ་ལས། སྐྱབས་སེང་བུ་སྡེ་ལྔ་དང་། དགྲ་ངན་དཔུང་ཚོགས་བཅུ་གཉིས་མ་མཐུན་པའི་ཚེ། རྒྱལ་པོ་རུ་པ་ཏི་ཞེས་པ་དཔུང་དང་བཅས་པ་ཁ་བ་ཅན་དུ་བྲོས་པའི་རྒྱུད་ཡིན་པར་བཤད་དེ། བཀའ་གདམས་བརྒྱུད་པ་འདི་པ་གཉིས་ཀའི་རྒྱུད་དུ་བཞེད་ལ། དེ་ནས་བོད་ཀྱི་རྒྱལ་པོ་ལ་སྔ་མ་རྗེ་གཉའ་ཁྲི་བཙན་པོ་ནས། རྒྱལ་རབས་ཉི་ཤུ་རྩ་བརྒྱད་པ། སངས་རྒྱས་སྨན་བླའི་སྤྲུལ་པ་ལྷ་ཐོ་ཐོ་རི་གཉན་བཙན་བྱོན་ཏེ་དམ་པའི་ཆོས་ཀྱི་དབུ་བརྙེས་པ་ཙམ་མཛད། དེ་ནས་རྒྱལ་རབས་ལྔ་པ་ལ་འཕགས་པ་སྤྱན་རས་གཟིགས་དབང་ཕྱུག་གིས་རྒྱལ་པོ་སྲོང་བཙན་སྒམ་པོའི་སྐུར་སྤྲུལ་ཏེ། བོད་ཀྱི་མི་རྣམས་དགེ་བ་བཅུའི་ལམ་ལ་བཀོད་ཅིང་དུད་འགྲོ་རྣམས་ཀྱི་རྣ་བར་ཡང་། ཨརྻ་ཨ་ཝ་ལོ་ཀ་ཞེས་བསྒྲགས་པ་སོགས་རིམ་གྱིས་ཐར་པའི་ས་བོན་འཇོག་པར་མཛད། དེ་ནས་རྒྱལ་རབས་བཞི་ན་འཕགས་པ་འཇམ་དཔལ་གྱི་སྤྲུལ་པར་གྲགས་པ་བྱང་ཆུབ་སེམས་དཔའ་ཁྲི་སྲོང་ལྡེའུ་བཙན་གྱིས་ཟ་ཧོར་གྱི་མཁས་པ་ཆེན་པོ་ཞི་བ་འཚོ་སྤྱན་དྲངས་ནས། སད་མི་མི་བདུན་ལ་སོགས་པ་རབ་ཏུ་བྱུང་ཞིང་། སློབ་དཔོན་པདྨ་འབྱུང་གནས་ཀྱིས་བོད་ཀྱི་ལྷ་སྲིན་གདུག་པ་ཅན་རྣམས་བཏུལ། སངས་རྒྱས་ཀྱི་བསྟན་པ་བཙུགས་པ་ལས། དེ་དག་ཉིད་ཀྱི་རིང་ལ་ཕ་རོལ་ཏུ་ཕྱིན་པ་དང་། རྡོ་རྗེ་ཐེག་པའི་བསྟན་པ་མཐའ་དག་རྒྱས་