[A:༣༤བ]གཟུགས་མེད་ཚོར་བ་མེད་གྱིས་གསུངས་པས། ལྷག་པར་དད་དེ་རྗེས་སུ་འབྲངས་པ་ན། སྤྲང་པོའི་ཚོགས་ལ་ཟན་གནང་བ་མཐོང་བས། བྱིས་པ་ཅིག་གི་སྐལ་བ་ཆད་དེ་ཕྱི་ལ་བརྒྱུག་ཅིང་། ཨ་ཏི་ཤ། བྷ་ལ་ཧོ། བྷ་ཏ་འོན། ཞེས་པ་ཐོས་པས། ཨ་ཏི་ཤ་ཡིན་ངེས་སྙམ་ནས་ཡུས་ཀྱིས་དངངས་ཏེ་ཕྱི་ལ་ཕྱིན་པས། དེར་བཞུགས་ཏེ། ཚེ་དང་ལྡན་པ་བདེན། མཆི་མ་མ་འབྱིན། ཁྱེད་བོད་ངས་ད་དུང་བློས་བཏང་བ་མེད་ཀྱིས། དཀོན་མཆོག་ལ་གསོལ་བ་ཐོབ་གསུངས། དེ་ནས་ལན་གཅིག་རྒྱའི་གཟིམ་ཁང་དུ་ཚུལ་ཁྲིམས་རྒྱལ་བས། ཇོ་བོ་སྤྱན་དྲངས་ནས་གསེར་སྲང་བདུན་བརྒྱ་མཎྜལ་དང་བཅས་པ་ཕུལ། ཇོ་བོ་སྤྱན་འདྲེན་པ་ལ་བོད་ཀྱི་མི་ནོར་སོང་བ་དང་། ཆོས་རྒྱལ་ཁུ་དབོན་གྱིས་ཁྱེད་ཀྱི་ཕྱོགས་སུ་དཀའ་བ་སྤྱད་ལུགས། བོད་ན་ཆོས་ལོག་ཡོད་ཚུལ་ལ་སོགས་པ་ལྷ་བཙུན་པས་ཞུ་བ་བསྐུར་བ་རྣམས་རྒྱ་བརྩོན་འགྲུས་སེང་གེས་རྒྱས་པར་སྙན་དུ་གསོལ་ཏེ། ད་ཡང་ཚེ་དང་ལྡན་པ་འདི་ཇོ་བོ་སྤྱན་འདྲེན་པ་ལ་བཏང་བར་འདུག་པས། མགོན་པོ་ངེད་གཉིས་ཀྱིས་ཇི་ཙམ་པའི་དཀའ་བ་ཅིག་སྤྱད་ཀྱང་། འདོད་པའི་དོན་མ་གྲུབ་པ་ངེད་བོད་ཀྱི་སེམས་ཅན་རྣམས་སྙིང་མི་རྗེའམ། ལྷག་པར་ཡང་གུང་ཐང་པ་འདི་རབ་ཏུ་བྱུང་ནས་སངས་རྒྱས་ཀྱི་བསྟན་པ་ལ་ཐོས་བསམ་མ་གཏོགས། མི་འགྲུབ་པའི་བྱ་བ་མ་བབས། ད་ལན་ཅིས་ཀྱང་འབྱོན་པར་མཛད་དུ་གསོལ་ཞུས་པས། ཇོ་བོའི་ཞལ་ནས། ཁྱེད་ལོ་ཙཱ་བ་རྣམས་ཤིན་ཏུ་བདེན། བོད་ཀྱི་ཆོས་རྒྱལ་དེའི་མི་ནོར་མང་པོ་སོང་བས་ངོ་གནོང་། ཁོ་བོ་སྙིང་རྗེ་ཆུང་པ་མིན་ཀྱང་བསྟན་པའི་བྱ་བ་ཆེས། གཙུག་ལག་ཁང་བརྒྱ་རྩ་བརྒྱད་ཀྱི་ལྡེ་མིག་དང་ཆོས་འཕྲོ་