[A:༣༥ན]ཡང་མང་པོ་ཡོད་ན་ཡང་རྒས་པས་ཐོན་པར་དཀའ་མོད། འོན་ཀྱང་བོད་ཀྱི་ཆོས་རྒྱལ་ཁུ་དབོན་དང་། ལོ་ཙཱ་བ་རྣམས་ཀྱི་དཀའ་སྤྱད་ཆུད་མ་ཟོས་པ་ཞིག་བྱ་ཡིས། རེ་ཞིག་གསེར་རྣམས་ཚགས་མཛོད། ངེད་འབོད་དུ་འོང་སྐད་མ་ཟེར། ལོ་ཙཱ་མཁས་པར་སློབས་གསུངས། དེའི་ནུབ་མོ་ཇོ་བོས་རྗེ་བཙུན་མ་སྒྲོལ་མ་ལ་མཎྜལ་ཕུལ་ཏེ། བོད་དུ་ཕྱིན་ན་སངས་རྒྱས་ཀྱི་བསྟན་པ་ལ་ཕན་ནམ། རྒྱལ་པོ་བྱང་ཆུབ་སེམས་དཔའི་ཐུགས་དགོངས་རྫོགས་སམ། ལུས་སྲོག་གི་བར་ཆད་དུ་མི་འགྱུར་རམ། ཞེས་ཞུས་པས། སངས་རྒྱས་ཀྱི་བསྟན་པ་ལ་ཕན་ཞིང་། རྒྱལ་པོའི་ཐུགས་དགོངས་རྫོགས། ཁྱད་པར་ཨུ་པ་སི་ཀ་གཅིག་ལ་བརྟེན་ནས་འགྲོ་བ་མང་པོ་ལ་ཕན་པས། ཐེ་ཚོམ་མེད་པར་བོད་དུ་བཞུད། ཅེས་ལུང་བསྟན། དེ་ནས་ཇོ་བོའི་ཞལ་ནས་རྡོ་རྗེ་གདན་དུ་ལྡེང་གསུངས་པས། དེར་ཕྱིན་པ་ན་བྱིས་པ་གཞོན་ནུ་དར་དཀར་གྱི་གོས་གྱོན་པ། ཤེལ་གྱི་མདའ་གཞུ་ཐོགས་པ་ཞིག་བྱུང་སྟེ་ཕྱག་འཚལ་ཞིང་ད་མགོན་པོ་བོད་དུ་བྱོན་པར་ཞུ། བོད་ཀྱི་ཚེ་དང་ལྡན་པ་འདི་ཀུན་སྙིང་རྗེ་མོད་ཟེར་ཏེ་སོང་། ཇོ་བོ་ལ་བོད་སྐད་སྨྲ་བའི་བྱིས་པ་དེ་སུ་ཡིན་ཞུས་པས། ནངས་པར་རྡོ་རྗེ་གདན་གྱི་བྱང་ཕྱོགས་ནས་རྣལ་འབྱོར་མ་གཅིག་ཡོང་པས། དེ་ལ་དྲིས་པས། ནངས་པར་རྣལ་འབྱོར་མ་ཀྲྀཥྞ་སྐེད་ལ་དཀྲིས་པ། ཌཱ་མ་རུ་དཀྲོལ་ཞིང་གར་སྟབས་ལིང་ངེ་བ་ཞིག་བྱུང་པ་ལ། ཁ་སང་གི་ལོ་རྒྱུས་དྲིས་པས། ཁྱེད་བོད་ཀྱི་མི། ངེད་རྒྱ་གར་བ་ལ་འདྲི་བ་ཟེར་ནས་སོང་། ཡང་ཇོ་བོ་བྱང་ཆུབ་ཆེན་པོའི་དྲུང་ན་བཞུགས་པའི་གཡས་གཡོན་ན། ཁ་སང་གི་བྱིས་པ་དེ་དང་། བུ་མོ་སྔོ་ལྗང་མ་གཅིག་