[A:༤༥བ]གུང་ཐང་པ་ལྡེམ་དུ་བྱས་པ་གྱང་རིས་ལ་བཀོད་དེ་རབ་གནས་ལ་སོགས་པ་ཞག་ཉི་ཤུ་རྩ་གཉིས་ལ་ཚར་བར་མཛད་དོ། །དེ་ནས་ཇོ་བོ་རྒྱ་གར་དུ་འབྱོན་པར་བཞེད་ཀྱང་། ཨུ་པཱ་ས་ཀ་དང་། བོད་ཀྱི་བསོད་ནམས་ཀྱི་མཐུས། སླར་ཡང་མང་ཡུལ་དུ་བྱོན་ནས། ལྷ་ཁང་ཀེང་རུ་བྱ་བ་བཞེངས། དེ་ནས་ལྷ་བཙུན་པས་དབུས་སུ་སྤྱན་དྲངས་ཏེ་ལས་སྟོད་དུ་ཕེབས། བོད་སྟོན་རྣམས་ཀྱང་དེར་བྱོན། གཙང་གི་ས་ཆ་རྣམས་སུ་བོད་ཀྱི་རྡོ་རྗེ་གདན་དཔལ་ས་སྐྱ་དང་། སྣར་ཐང་ལ་སོགས་པ་ལུང་བསྟན་མང་དུ་མཛད་དེ། ལོ་ཕྱེད་བཞུགས། དེ་ནས་བསམ་ཡས། ཐང་པོ་ཆེ། ལྷ་ས་རྣམས་སུ་ལྷ་བཙུན་བོ་དྷི་རཱ་ཛ། ཁུ་སྟོན་རྔོག་ལེགས་ཤེས་རྣམས་ཀྱིས་རིམ་གྱིས་སྤྱན་དྲངས་ནས་ཆོས་མང་དུ་གསུངས། གསང་ཕུ་ལ་སོགས་པ་ལུང་བསྟན། ཁྱད་པར་ལྷ་སར་ཀ་བ་བུམ་པ་ཅན་གྱི་ཉེ་འཁོར་ནས་རྒྱལ་རབས་ཀ་བཀོལ་མ་མཁའ་འགྲོས་ལུང་བསྟན་ནས་བཏོན། དེ་ནས་རྔོག་བྱང་ཆུབ་འབྱུང་གནས་གྱིས་ཡེར་པར་སྤྱན་དྲངས། དུས་དེར་བཀའ་གདམས་གླེགས་བམ་གྱི་ཞུ་ལན་ཕལ་ཆེ་བ་རྔོག་གིས་ཞུས་ནས་གནས་དེར་མཛད། དེ་ནས་དཔང་སྟོན་གྱིས་སྙེ་ཐང་དུ་སྤྱན་དྲངས། ལོ་ངོ་དགུ་བཞུགས་པའི་ལོ་དྲུག་གི་བར་ལ་འགྱུར་མང་པོ་དང་། རྒྱུད་སྒྲུབ་ཐབས། མན་ངག་སོགས་གང་ལ་གང་འདུལ་གྱི་ཆོས་གསུངས། རིན་པོ་ཆེ་སྣ་ལྔའི་མེ་ཏོག་གི་ཆར་བབས། ལོ་གསུམ་མམ། ངོ་བཞིར་མཁའ་འགྲོའི་དབུས་སུ་རྡོ་རྗེའི་གླུ་རྣམས་གསུངས། དེ་རྣམས་སུ་ཡང་ཡི་དམ་དཔག་ཏུ་མེད་པའི་ཞལ་གཟིགས་པ་སོགས་རྒྱས་པར་ལམ་ཡིག་ཏུ་གསལ་ལོ། །མདོར་ན་