[A:༣༢བ]བྱིས་པ་དེས་ཕྱིན་པས་གང་ཡིན་ངོ་མ་ཤེས་པར་སླར་ལོག་ཡོང་བས། ཡང་རྒན་པོ་ན་རེ། ཏ་ལའི་ལོ་མ་བཟུང་ནས་ཁ་ཏ་བྱེད་པ་དེ་ཡིན། ཆོས་གོས་ཀྱི་རྒྱབ་ན་ཡི་གེ་ཨ་གཅིག་ཀྱང་ཡོད་གསུངས། དེར་དེས་དེ་ལ་དེ་སྐད་བྱས་པས་ཀླུ་སྒྲུབ་ཀྱིས་བྱོན་པའི་ཚེ། རྒན་མོ་དེ་སྒྲོལ་མ་ལྷ་ལྔར་ཞལ་གཟིགས། ཁ་ཅིག་ལས་ལྷ་གསུམ་དུ་གཟིགས་ཞེས་ཀྱང་འབྱུང་། དེའི་ཞལ་ནས་ཁྱོད་ཀྱིས་གསེར་འགྱུར་གྱི་རྩིའི་སྒོ་ནས་སེམས་ཅན་གྱི་དོན་བྱེད་པ་ཡང་བཟང་སྟེ། དེ་ལས་ཀྱང་མཆོག་བསྒྲུབ་ན་སེམས་ཅན་གྱི་དོན་ཆེན་པོ་དེ་ལས་འབྱུང་བས་དཔལ་གྱི་རི་ལ་སྒྲུབ་པ་གྱིས་ཤིག་གསུངས་ནས་མི་སྣང་བར་གྱུར། དེ་ལྟར་ཞལ་གཟིགས་པའི་སྒྲོལ་མ་འདི་སློབ་དཔོན་ཐམས་ཅད་མཁྱེན་པའི་བཤེས་གཉེན་གྱི་ལུགས་ཀྱི་སྒྲོལ་མ་ལྷ་ལྔ་མ་མེ་ཏོག་ཕྲེང་འཛིན་དུ་གྲགས་པ་དེ་ཡིན་པར་བཤད། ཐམས་ཅད་མཁྱེན་པའི་བཤེས་གཉེན་གྱི་ལྷ་ལྔའི་སྒྲུབ་ཐབས་ཀྱང་མཛད། སློབ་དཔོན་འདིས་དེ་ལྟར་ཞལ་གཟིགས་པའི་ཚེ་གཙོ་བོ་རྐྱང་བའི་སྒྲུབ་ཐབས་མཛད་དོ། །དེ་ནས་སྒྲ་མི་སྙན་དུ་གཤེགས་པའི་ལམ་གྲོང་ཁྱེར་དུ་པ་ལ་མ་བྱ་བར་བྱིས་པ་ཛི་ན་ཏའི་ལག་རིས་གཟིགས་ནས་རྒྱལ་པོར་ལུང་བསྟན་ནས་སྒྲ་མི་སྙན་དུ་བྱོན། ན་བཟའ་ཤིང་ལ་བཀལ་ཏེ་ཁྲུས་མཛད་པས་གོས་གཞན་དག་གིས་ཁྱེར་བ་ལ་ངའི་ཡིན་གསུངས་པས། ང་བདག་ཅན་ཟེར་ནས་གཏད། དེ་ནས་སྒྲ་མི་སྙན་པའི་དོན་བྱས། སླར་ལོག་སྟེ་དཔལ་གྱི་རི་ལ་གཤེགས་པར་དགོངས་ནས་བྲམ་ཟེ་ཆེན་པོ་ལ་འབུལ་བའི་ཕྱིར་བདུད་རྩི་བསྒྲུབ་པ་བསླབས་ནས་བུམ་པ་གང་ཁྱེར་ཏེ་བྱོན་པའི་ལམ་དུ་སྔར་གྱི་བྱིས་པ་དེ་རྒྱལ་པོར་གྱུར་པ་དང་མཇལ་