[A:32b]byis pa des phyin pas gang yin ngo ma shes par slar log yong bas/ yang rgan po na re/ ta la'i lo ma bzung nas kha ta byed pa de yin/ chos gos kyi rgyab na yi ge a gcig kyang yod gsungs/ der des de la de skad byas pas klu sgrub kyis byon pa'i tshe/ rgan mo de sgrol ma lha lngar zhal gzigs/ kha cig las lha gsum du gzigs zhes kyang 'byung / de'i zhal nas khyod kyis gser 'gyur gyi rtsi'i sgo nas sems can gyi don byed pa yang bzang ste/ de las kyang mchog bsgrub na sems can gyi don chen po de las 'byung bas dpal gyi ri la sgrub pa gyis shig gsungs nas mi snang bar gyur/ de ltar zhal gzigs pa'i sgrol ma 'di slob dpon thams cad mkhyen pa'i bshes gnyen gyi lugs kyi sgrol ma lha lnga ma me tog phreng 'dzin du grags pa de yin par bshad/ thams cad mkhyen pa'i bshes gnyen gyi lha lnga'i sgrub thabs kyang mdzad/ slob dpon 'dis de ltar zhal gzigs pa'i tshe gtso bo rkyang ba'i sgrub thabs mdzad do/ /de nas sgra mi snyan du gshegs pa'i lam grong khyer du pa la ma bya bar byis pa dzi na ta'i lag ris gzigs nas rgyal por lung bstan nas sgra mi snyan du byon/ na bza' shing la bkal te khrus mdzad pas gos gzhan dag gis khyer ba la nga'i yin gsungs pas/ nga bdag can zer nas gtad/ de nas sgra mi snyan pa'i don byas/ slar log ste dpal gyi ri la gshegs par dgongs nas bram ze chen po la 'bul ba'i phyir bdud rtsi bsgrub pa bslabs nas bum pa gang khyer te byon pa'i lam du sngar gyi byis pa de rgyal por gyur pa dang mjal