[A:༣༧བ]ཞེས་ཁས་བླངས་སོ། །དེ་ནས་རྒྱ་གར་ཤར་ཕྱོགས་ཀྱི་ནང་པའི་པཎྜི་ཏ་རྣམས་ལ་འོ་སྐོལ་རྩོད་པ་བྱེད་དགོས། ཁྱེད་རྒྱལ་ན་ང་རང་ཆུ་བོ་གངྒཱ་ལ་འཆིར་འགྲོ་ཡི། ང་རྒྱལ་ན་ཁྱེད་རྣམས་ངའི་གྲུབ་མཐའ་ལ་འཇུག་དགོས་ཤིང་ཁྱེད་ཀྱི་གཙུག་ལག་ཁང་དང་ཆོས་རྣམས་ཀྱང་བསྲེག་དགོས་ཟེར་ཏེ། རྩོད་པ་བྱས་པས་ཁོ་རྒྱལ་ནས་རྒྱ་གར་ཤར་ཕྱོགས་ཀྱི་སངས་རྒྱས་ཀྱི་བསྟན་པ་ཕལ་ཆེར་བཤིགས། དེ་བཞིན་རྒྱ་གར་ལྷོ་ཕྱོགས་སུའང་བྱས་ནས་མ་ལ་ངས་འདི་ལྟར་བྱས་སོ་ཞེས་བསྒྲགས་པ་དང་། མའི་བསམ་པ་ལ་ཀྱེ་མ་འདི་ནང་པའི་པཎྜི་ཏ་ཞིག་གིས་ཕམ་པར་བྱས་ནས་ནང་པའི་བསྟན་པ་ལ་བཙུད་ན་ཅི་མ་རུང་སྙམ་དུ་བསམ་སྟེ། བུ་སངས་རྒྱས་ཀྱི་བསྟན་པ་རྟའི་ལུས་ཙམ་ལ་རྒྱ་གར་ཤར་དང་ལྷོ་ན་རྣ་བ་ཙམ་ཡང་མེད། དེ་གཉིས་ན་ནང་པའི་པཎྜི་ཏ་མཁས་པར་ཆུད་པ་ཡང་མེད། དེ་དག་ཕམ་པར་བྱས་པས་ཁྱོད་མཁས་པར་ཡང་མི་ཆ། བསྟན་པ་རྫོགས་པ་དང་པཎྜི་ཏ་མཁས་པ་ཡུལ་དབུས་ནཱ་ལེནྡྲ་ན་ཡོད་པས། དེ་དག་ལས་རྒྱལ་ན་མཁས་པར་འགྱུར་བ་ཡིན་ནོ། །ཞེས་སྨྲས་པས། ཁོ་ང་རྒྱལ་སྐྱེས་ཏེ། དེ་ཐམས་ཅད་མིང་མེད་པར་བཅོམ་ལ་མུ་སྟེགས་པའི་བསྟན་པ་ལ་གཞུག་སྙམ་སྟེ། ཡུལ་དབུས་སུ་ཕྱིན་ཏེ། གནས་དེ་ན་གརྡྷོ་ལ་ཆེན་པོ་བདུན། ལྷ་ཁང་ཆེན་པོ་བཅུ་བཞི། པཎྜི་ཏ་མཁས་པ་སྟོང་ལྔ་བརྒྱ་ཡོད་པ་རྣམས་ལ། ཁོས་ང་མུ་སྟེགས་རྟ་དབྱངས་བྱ་བ་ཡིན་ཁྱེད་དང་རྩོད་པ་བྱེད། ཁྱེད་རྒྱལ་ན་ང་རང་ཆུ་བོ་གངྒཱ་ལ་འཆིར་འགྲོ། ང་རྒྱལ་ན་ཁྱེད་རྣམས་ངའི་གྲུབ་མཐའ་ལ་འཇུག་དགོས་ཤིང་། ཁྱེད་ཀྱི་གཙུག་ལག་ཁང་དང་གླེགས་བམ་