[A:༣༨ན]རྣམས་ཀྱང་བསྲེག་དགོས། དེའི་དཔང་པོ་རྒྱལ་པོ་ལ་འཆོལ་བ་ཡིན་པས་དུས་ཐོབ་ཅིག་བྱས་པས། དེར་ནང་པ་རྣམས་གྲོས་བྱས་ཏེ། འདི་མདོ་ནས་བསྟན་པ་ཉམས་པར་བྱེད་པར་ལུང་བསྟན་པ་ཡང་ཡིན་ཞིང་། རྒྱ་གར་ཤར་དང་ལྷོའི་ནང་པ་ཐམས་ཅད་ཕམ་པར་བྱས་འདུག་པས། འོ་ཅག་གིས་མི་ཐུབ་དཔལ་གྱི་རི་ནས་སློབ་དཔོན་ཀླུ་སྒྲུབ་ཡབ་སྲས་སྤྱན་འདྲེན་པ་རིགས་ཟེར། དེའི་བར་ལ་རེ་ཞིག་ལོང་ཡོད་པར་གྱིས་ཤིག དེ་ནས་ཞག་སུམ་ཅུ་ན་རྩོད་པར་བྱ་ཡི་ཞེས་དུས་བཏབ། དེར་ཁོས་ཀྱང་གཞན་ཞིག་སྦྲོན་པར་ཤེས་ཏེ། རེ་ཞིག་ཁྱེད་དང་རྩོད་པ་བྱེད་ཀྱི། ཕྱི་རོལ་ན་ཡོད་པ་ནང་དུ་མ་འགྲོ། ནང་ན་ཡོད་པ་ཕྱིར་མ་ལྡང་ཟེར་ཞིང་ཁོ་སྒོ་ལ་ཉལ་ནས་ཕྱི་ནང་གི་འགྲུལ་བཅད་དོ། །དགེ་འདུན་རྣམས་གདུགས་ཚོད་གསོལ་བའི་བར་ལ་མགོ་ལ་དབྱུ་གུས་བརྡེག་ཅིང་གྲངས་བྱེད་དོ། །དེར་དགེ་འདུན་རྣམས་ཀྱིས་སློབ་དཔོན་ཡབ་སྲས་སྤྱན་འདྲེན་པ་ལ་མི་ཕྱིན་ཀྱང་དུས་ལ་མི་སླེབ། ཆོས་སྐྱོང་མགོན་པོ་ལ་གསོལ་བ་གདབ་བོ་ཞེས་གྲོས་བྱས་ནས་ཞུ་འབུལ་གྱི་འཕྲིན་ཡིག་འདི་ལྟར་ཏེ། ཤིན་ཏུ་ཁུར་དཀའ་ཁུར་གྱིས་ལུས་དུབ་ཁྱུ་མཆོག་རྣམས་ནི་ཁྱོད་ལ་གསོལ་འདེབས་ན། །ཀྱེ་མ་རྨ་མེད་ཉིད་དུ་རོལ་པ་འབའ་ཞིག་གིས་ནི་རབ་ཏུ་འཁྲུག་བྱེད་དམ། །འདི་ན་ནུས་ལྡན་གཞན་མེད་འཁོར་ལོ་བྱིང་བ་ཅན་གྱི་ཤིང་རྟ་མྱུར་དུ་དྲོངས། །ལྟ་ཞིང་འདུག་གམ་ཡུན་རིང་གནས་ཀྱང་འདི་ནི་ཁྱོད་ཀྱི་ཁུར་ཡིན་ཕྲག་ལ་ལོངས། །ཞེས་པ་བྲིས་ཏེ་གཏོར་མའི་སྟེང་དུ་བཞག་ནས་མགོན་པོ་ལ་གསོལ་བ་བཏབ་པས། བྱ་རོག་གཅིག་བྱུང་སྟེ་