[A:༤༢བ]ཀྱི་རྩ་བ་སྨོས་པས་ལུང་རིགས་ལ་མཁས་པར་ཁས་བླངས་ཀྱང་ཚིག་ཁེངས་བསྐྱུངས་པར་འདུག་པས། འདི་ཙནྡྲ་གོ་མི་ཡིན་ནམ་སྙམ་སྟེ་མིང་དྲིས་པས། ཙནྡྲ་ཞེས་འཇིག་རྟེན་པ་རྣམས་འདོགས་སོ་ཟེར། འོ་ན་པཎྜི་ཏ་ཆེན་པོ་ཐོག་བབས་སུ་བྱོན་པ་མི་ལེགས། བསུ་བ་བྱ་དགོས་པས་རེ་ཞིག་ཕྱིར་བྱོན་ཅིག་ཕྱིར་བསུ་བ་བགྱིད་དོ་ཞེས་གསུངས་ནས་ཆོས་འཆད་འཕྲོ་བཅད། གཎྜཱི་བརྡུངས་ནས་པཎྜི་ཏ་རྣམས་བསགས། འདིར་མཁས་པ་ཆེན་པོ་ཙནྡྲ་གོ་མི་བྱོན་གྱི་བསུ་བ་བྱ་དགོས་ཀྱི་ཤིང་རྟ་གཉིས་ཤོམས་ལ་གཅིག་ལ་འཇམ་དཔལ་གྱི་སྐུ་བཞུགས། གཅིག་ལ་ཙནྡྲ་གོ་མི་བཞུགས་ལ་མཆོད་པའི་ཚོགས་ཀྱིས་སྤྱན་དྲོངས་ཤིག་ཅེས་བསྒོས་ཏེ། འཇམ་དཔལ་གྱི་སྐུ་ལ་སློབ་དཔོན་ཙནྡྲས་འཇམ་དབྱངས་ལ་ཕྱོགས་བཅུའི་དེ་བཞིན་གཤེགས་པ་བྱེ་བ་རྣམས་ཀྱིས་བསྟོད་པར་གྱུར་མོད། །དེ་ལྟ་ནའང་བསམ་པ་བླུན་པོ་བླ་མ་ལ་གུས་ཞེས་སོགས་ཀྱིས་བསྟོད་པས། དེ་དགེས་ཏེ་སློབ་དཔོན་ལ་འཇམ་དབྱངས་ཀྱི་ཞལ་ཕྱིར་གཟིགས་པས། ད་ལྟ་ཡང་ན་ལེནྡྲ་ན་བྱིན་རླབས་ཆེ་ཞིང་འཇམ་དབྱངས་མཇིང་ཡོན་དུ་གྲགས་པ་བཞུགས་ཞེས་གྲག་གོ །དེར་ནཱ་ལེནྡྲར་བྱོན་བསྙེན་བཀུར། ཟླ་གྲགས་དང་གདན་འཛོམ། ཕན་ཚུན་ཆོས་ཀྱི་བགྲོ་བ་མཛད་པས། ཟླ་གྲགས་ཀྱིས་གང་དྲིས་པའི་ལན་ཐོགས་མེད་དུ་བཏབ། ཙནྡྲས་སྤྱན་རས་གཟིགས་ལ་དྲི་ཞིང་ལན་ཐོགས་བཅས་སུ་ཐེབས། ཟླ་གྲགས་ཀྱིས་བལྟས་པས་སྤྱན་རས་གཟིགས་རྡོ་སྐུ་བཞུགས་པའི་ཁང་པ་ནས་བྱུང་ནས། ལན་ཅིག་དེར་སོང་ནས་རྒྱབ་ནས་མཉན་པས་རྡོ་སྐུ་ཉིད་སྤྲུལ་སྐུར་མཛད་ནས་ཆོས་འཆད་ཀྱིན་འདུག་པ་དང་། ཞལ་བལྟ་དགོས་སྙམ་ནང་དུ་ཕྱིན་པས་སྤྲུལ་སྐུ་ཞལ་བརྟུལ་ཏེ། དེར་སློབ་དཔོན་