[A:༤༢ན]བཤད་སྲོལ་གཙོ་བོར་འཛིན་པ་སྟེ། དེ་ཡང་རྩ་བ་ཤེས་རབ་ལས། བདག་ལས་མ་ཡིན་གཞན་ལས་མིན། །ཞེས་སོགས་དམ་བཅའ་བཞི་གསུངས་པ་ལ། སྒྲུབ་བྱེད་ཀྱི་རིགས་པ་ཐལ་འགྱུར་གྱི་རིགས་པའི་སྒོ་ནས་བསྒྲུབ་རིགས་པར་སངས་རྒྱས་བསྐྱང་གིས་གསུངས་ནས། ལུགས་དེ་ལ་དབུ་མ་ཐལ་འགྱུར་བར་གྲགས། ལེགས་ལྡན་འབྱེད་ཀྱི་སངས་རྒྱས་བསྐྱང་གི་བཞེད་པ་དེ་བཀག་ནས་རང་རྒྱུད་ཀྱི་རིགས་པའི་སྒོ་ནས་བསྒྲུབས་པས་དབུ་མ་རང་རྒྱུད་པར་གྲགས་ཏེ། མདོར་ན་དབུ་མ་ཐལ་རང་ཞེས་པའི་ཁ་སྐད་འདི་སློབ་དཔོན་དེ་གཉིས་ནས་བྱུང་བ་ཡིན་ནོ། །ཡང་ཉེ་སྲས་དཔའ་བོ་ནི། གོང་དུ་བསྟན་པ་ལྟར་རྟ་དབྱངས་ཡིན་ནོ། །ཡང་དངོས་སློབ་ཏུ་འདོད་པ་ལྟར་ན་སྲས་ཀྱི་གཙོ་བོ་བཞིའི་ནང་ཚན་ནམ། དགོངས་པ་སྐོང་བའི་སློབ་མ་ཟླ་བ་གྲགས་པ་ནི་དག་པའི་སྣང་བར་འཕགས་པ་ཀླུ་སྒྲུབ་ལ་ཆོས་གསན་ཅིང་རྩོད་དུས་ཀྱི་པཎྜི་ཏ་ཁྱད་པར་ཅན་ཞིག་སྟེ། དེ་ཡང་སྤྱིར་དེ་དུས་ནཱ་ལེནྡྲ་ན་པཎྜི་ཏ་མང་དུ་ཡོད་ཀྱང་། མུ་སྟེགས་བྱེད་ཀྱི་རྒོལ་བ་ཚར་གཅོད་མི་ནུས་ན་ཕྱིར་ཆོས་མི་འཆད་པ་ལ། སློབ་དཔོན་ཟླ་བ་གྲགས་པས་ནི་ཕྱིར་ཆོས་འཆད་ནུས་པ་ལས། དེའི་ཚེ་རྒྱ་གར་ལྷོ་ཕྱོགས་ཀྱི་མཁས་པ་ཆེན་པོ་ཙནྡྲ་གོ་མི་སློབ་དཔོན་འདི་ཡི་དྲུང་དུ་འོངས་ཏེ་འདུད་པ་མ་བྱས་པར་བསྡད་པ་དང་། ཟླ་གྲགས་ཀྱི་ཐུགས་དགོངས་ལ་རྩོད་དམ་བགྲོ་བར་འདོད་པ་གཅིག་འདིར་འོངས་པ་ཡིན་ཏེ་འོང་སྙམ་ནས། ཕྱོགས་གང་ནས་འོང་། ཆོས་ཅི་ཤེས་དྲིས་པས། ལྷོ་ཕྱོགས་ནས་འོངས། སྒྲ་པཱ་ནི། ཤེར་ཕྱིན་ཚུལ་བརྒྱ་ལྔ་བཅུ་པ། འཇམ་དཔལ་མཚན་བརྗོད་ཤེས་ཟེར་བས། སྒྲ་དང་མཚན་ཉིད་ཀྱི་རྩ་བ་དང་། སྔགས་