[A:༡༣ན]ཆགས་ཙམ་ཡང་དིང་སང་གི་དགེ་བ་ལ་གཅིག་ཏུ་ཞུགས་པར་རློམས་པ་རྣམས་ཀྱིས་ཉིན་ཞག་དུ་མར་འབད་ཀྱང་གྲུབ་པར་དཀའ་བར་མཐོང་ཞིང་། དེ་ལྟར་རིམ་གཉིས་ཀྱི་ཏིང་ངེ་འཛིན་ཟབ་མོ་ལ་གཡེལ་བ་མེད་པར་བཞུགས་པའི་འབྲས་བུ་གནས་སྐབས་སུ་བླ་མ་ཡིད་དམ་སོགས་ཀྱིས་ཞལ་བསྟན་ཞིང་རྗེས་སུ་བཟུང་བའི་མཚན་མ་ཡང་བསམ་གྱིས་མི་ཁྱབ་པ་མངའ་བ་ཡིན་ཏེ། དེ་ཡང་བདག་ཉིད་ཆེན་པོ་འདིས་དགུང་ལོ་ཉི་ཤུ་རྩ་གྲངས་བཞེས་པའི་སྐབས་ཤིག རྩེ་གདོང་གི་དགོན་གཞིས་མདོ་ཆོས་གཟིམ་ཁང་དུ་སྐུ་མཚམས་མཛད་ནས་རྡོ་རྗེ་ཕུར་པ་གཙོར་བོར་གྱུར་པའི་ཐུགས་དམ་གནང་དུས། ས་བིར་ཞལ་སྤྲོས། བཅོམ་ལྡན་རྡོ་རྗེ་གཞོན་ནུ། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་རྣམས་ཀྱི་ཞལ་གཟིགས་པ་དང་། བདག་ཉིད་ཆེན་པོ་འདི་དགུང་ལོ་སུམ་བཅུ་སོ་གཉིས་སུ་ཕེབས་པ་མེ་ཕོ་བྱི་བའི་ལོ་ན་ལནྡྲར་གསུང་ངག་རིན་པོ་ཆེ་འབྲས་བུ་དང་བཅས་པའི་ཐོག་དྲངས། ཁྲིད་ལུང་མན་ངག་དབང་བྱིན་རླབས་རྗེས་གནང་སོགས་ཟབ་རྒྱས་ཀྱི་དམ་པའི་ཆོས་མང་པོ་སྩལ་བ་ན། དེའི་སྐབས་སུ་རྗེས་སངས་རྒྱས་རིན་ཆེན་ཡང་ཕེབས་ཏེ་དེ་ནས་ཡབ་སྲས་ལྷན་ཅིག་ཏུ་གཙང་ཕྱོགས་ལ་གདན་བཏེག་སྟེ། ཡར་ལམ་སྲིན་པོ་རི་མཇལ་བར་ཕེབས་པས། བདེ་མཆོག་གི་སྐུ་དེ་བདེ་མཆོག་ཞལ་བཞི་ཕྱག་བཅུ་གཅིག་པར་གཟིགས་ནས་སྐུ་ལུས་ལ་འཕར་གཡོ་ལ་སོགས་པ་བྱུང་སྟེ་གར་སྟབས་སྣ་ཚོགས་མཛད་ཅིང་། དེ་ནས་དེ་ལས་སངས་པ་ན་ཁྱེའུ་དཀར་པོ་གཅིག་གིས་བསུ་བ་བྱས་ནས་བསྐོར་ལམ་ལ་ཕེབས་པས། དེའི་དུས་སུ་རྗེ་སངས་རྒྱས་རིན་ཆེན་གྱིས་འཁོར་རྣམས་ལ། ཁོང་པ་ལ་གཟིགས་སྣང་དང་ཉམས་རྟོགས་མང་པོ་འཁྲུངས་