[A:108]bkod pas khyad par du 'phags pa bzhengs/ chos 'khor gling btab nas mtshan nyid kyi bshad grwa dang / dbus gling du sngags grwa 'dzugs pa sogs rnam dkar gyi mdzad pa rgya chen pos gong ma shin tu dgyes/ 'di'i gcung po rin cen dbang phyug rab tu byung / dga' bde'i sras gnyis las che ba rin cen seng ge/ chung ba smon lam rdo rje/ 'di nyid kyis lha sa'i bar skor dang / brag lha klu sbug gi rgya phibs/ jo bo dang thugs rje chen po gnyis kyi dbu thog tu gser thog 'bum mo che'i ganydzi ra/ bka' 'gyur dang / dbus gling 'od gsal 'phrul gyi lha khang bzhengs pa sogs/ dkar phyogs kyi mdzad pa bla na ma mchis pa mang zhing / srid kyi mnga' thang lnga kun gsal gyi 'gram pa la reg pa lta bur gyur/ 'di'i sras che ba dpon kun dga' rdo rje yab mes kyi chos dang rig pa'i gnas thams cad la mkhyen pa mchog tu yangs shing / gong nas phyir byon te/ sku gsung thugs kyi rten dang ri bo dge 'phel 'debs pa sogs chos srid kyi mdzad pa mi dman pa mtha' yas/ slar yang khri dpon gyi las ka gcung po grags pa shes rab la gtad de rab tu byung ba'i mtshan drung chen thams cad mkhyen pa dge ba'i blo gros su grags/ mkhas pa'i dbang po bu ston rin po che tshal du bka' 'gyur gyi rab gnas la gdan drangs skabs/ tshal pa dpon po'i kha ya byed dgos pas rang dgar phyin na mi yongs gsungs nas/ phyag dpe mang po bsnams te lam du gzigs skad/ chos rje bsod grags pas/ chos 'khor gling drung chen smon lam rdo rjes btab pa dang / si tu dge ba'i blo gros dang drung chen kun dga' rdo rje so sor 'dren pa sogs ni yig tshang gi zhib cha ma nges pa'i 'ol tshod kyi gtam ste/ 'di dag la 'dris pa chung ba'i dbus su wa skyes rgyal po'i rnam thar 'dzin pa'i tshul yin mchis na'ang / deb ther la 'dris pa rnams kyis brtags tshe bzhad gad kyi gnas so//