[A:115]brdzes te thal 'gyur 'phen pa sogs mkhas pa rnams spa bkong bar mdzad/ dus kyi 'khor lo'i dgongs 'grel dang / 'jig rten mes po'i gtsug lag mi mthun pa'i nad kyi rtsa ba drungs nas dbyung bar byed pa'i gso ba rig pa'i gzhung lugs kun gyi yang snying rje btsun g.yu thog pa chen po'i ring lugs gsal bar byed pa'i bstan bcos/ log smra tshar gcod pa sgra rig pa'i bstan bcos kyi nying khu ka lA pa'i mdo rgyan/ bzo rig pa de bzhin gshegs pa'i sku gzugs kyi phyag tshad/ bstan pa'i gnas tshad/ gsang ba sngags kyi lha'i sgrub thabs kyi rim pa/ ma 'ongs mngon sum gsal bar ston pa gtsug lag rtsis kyi skor/ mkhas grub chos rje'i rtsod lan sogs legs par bshad pa'i rtsom pa'i rigs ji snyed cig mchis shing / dus kyi 'khor lo'i blos slangs sogs sku gsung thugs kyi rten bzheng mang du mdzad/ mnal lam du slob dpon chen po zhal gzigs pa dang rje sa chen la thugs dad shugs drag po 'khrungs pas sa chen dbu gtsug nas thim pa'i snang ba sogs rtogs pa'i yon tan kyang mtha' yas shing rig pa'i gnas mtha' dag la mkhyen pa'i spyan yangs pas rgyal po paNDi ta zhes snyan pa'i rgyud kyis rgya gar mkhas pa'i khengs dregs kyi gzhu yongs su 'gugs shing / rin po che'i rgyan sogs mi chen gyi cha lugs dang ldan bzhin du sa dge'i mtshan nyid kyi slob dpon mkhas pa rnams la gsung rab mtha' dag brgal brtag gis gtan la 'bebs pa'i bgro gleng mdzad pa sogs 'chad rtsod rtsom pas dus 'da' bas spyir yang ngo mtshar che/ khyad par 'gro ba'i 'dren par rlom pa'i dregs ldan chos smra ba'i lce mdud pa brgya phrag gis bcings pa rnams kyi snang tshul la dpags na rjes su yi rang ngo //
de rjes nam mkha' tshe dbang rdo rje/ de'i sras nam mkha' rin cen bsod nams rgyal mtshan/ kun dga' legs pa gsum las 'bring po rab tu