[A:122]rlangs kyi gdung brgyud ces ming de nas chags/ 'ga' zhig tu ga gla btags su snang ba ni yig mkhan gyis ma dag pa'i rgyun 'byams par nges so/ /
de'i jo mo ldong bza' khri sgron la sras dpa' bo/ de'i jo mo lcog ro bza' lha gnam gyi sras stong tho/ de'i sras che che/ de'i sras rgod lding / gcen po'i steng du rgod lding ba ltar 'phur bas ming de ltar chags/ de'i sras stong dge/ de'i sras stong khri/ de'i sras phag tshang / de'i sras ldang ra/ de'i sras gtsug gnyen rdzong khong / de'i sras btsan pa 'dab shong / de'i sras snang gnyan khong sleb/ de'i sras mang po che sgro kha/ de'i sras stag po che dar dpal/ 'dis ma pham g.yu mtsho'i 'gram du gser gyi shAkya mu ni bzhengs/ g.yu snang ba 'od ldan yon du phul/ byu ru bkra shis 'od 'bar gyi mchod rdzas byas/ grub thob seng ge rab gnas su gdan drangs pa'i tshe/ sgang bza' lha mo la sras gcig 'khrungs pa/ grub thob kyis mtsho ni bzang zhing sras 'di lha'i spyan gyis gzigs pa zhig byung bas/ mtsho bzang lha gzigs su thogs gsung / 'di nas bzung ste rlangs lha gzigs su grags/
'di'i sras a mi byang chub 'dre 'khol te/ dgung lo brgyad la o rgyan du byon pa dang / srin po btul nas phyir byon pa'i tshe yi dam gyi lha zhal gzigs pa dang / ge sar gyis gling yul du lan gnyis gdan drangs pa'i phyi ma'i tshe/ pha bong gwa ba rta 'dra ba la chibs nas phyogs bzhir gdon chen po bzhi btul ba sogs rdzu 'phrul ni mtha' yas shing / sngar byang chub rdo rje zer yang / phyis lha srin bran du 'khol bas 'dre 'khol du mtshan chags/ slob dpon chen po padmas kyang / byang dang chub ces bya ba yi/ / mi bu khyad du 'phags pa 'ong / / de ni nga yi thugs kyi sras/ / zhes gsungs shing / byang chub 'dre 'khol nyid kyi gsung du yang / / da nas mi rabs bcu gsum na/