[A:2]tshar du dngar ba'i mkhyen pa'i ge sar gzhon nu'i lang tsho'i lcags kyu yis//
chos kun ri dwags mig can ma yi snying la bsnun pa'i rang dbang du//
'du 'bral zlos gar ri mo'i snang brnyan chos nyid me long gtsang ma'i ngos//
rjen par 'char ba'i byed po zur phud lnga pa mgrin pa'i rgyan du bzhugs//
snang mdzod 'bum gyi dra bas 'khyud pa'i byu ru'i rdul brtsegs la//
brtan g.yo'i dngos kun dbang du byed pa'i yon tan yongs rdzogs pa'i//
zur mig nyag phran tsam gyis dge ba'i gzugs can 'dus ma byas//
'dar mdzad rig byed lha mos srid pa gsum la mnga' sgyur cig/
yid 'ong bzhin ras zla gzhon 'khor lo gnyis skyes la//
'khrul ba ster yang 'phyang mo sel byed mgo skyes kyi//
bai DUr mthing kha'i lan bu rab 'phyang dbyangs can ma//
smra ba'i dbang phyug ngag gi rgyal po nyer grub mdzod//
gangs can lha lam yangs pa'i khyon 'dir rgyal ba'i bstan pa bcu gnyis bdag po'i gur khang mchog/
mkhyen brtse nus pa'i nam mkha'i gru yis nye bar 'dren mdzad chos rgyal mes dbon rnam gsum dang //
rgyal ba kun dngos mtsho skyes rdo rje bstan pa'i rtsa lag thams cad mkhyen pa zhi ba 'tsho'i//
bka' drin gzugs can dbyig 'dzin lto 'dir shong 'gyur min na kun mkhyen srang las gang gis gzhal//