[A:63]'khor lo 'gro ba'i mgon du rgyal po'i tshul gyis rnam par rol pa'i sprul pa'i gang zag gi phan bde'i sman yon du thabs mkhas kyi mdzad pa brgya phrag gis brtsigs pa'i gtsug lag khang dga' ston gyi gzhan dbang du btang nas mchod pa dang zhabs tog med par smra ba/ dam pa'i yul la skur pa btab pa'i sgrib pa dpag tu med pa gsog cing / skye bo tha chad pa 'ga' zhig dus ston du ming gis btags pa'i chang sogs kyis bag med par myos te/ chos srid kyi bya ba mtha' dag yal bar 'dor ba'i rnam pa chos kyi rgyal po de dag la 'char ba'i tshig 'di rnams la brtags na/ mkhas pa phal cher gyi sba bzhed la khungs su mdzad kyang bslad pa ma zhugs pa'i khungs thub pa zhig dka' bar snang ngo //
de ltar rab gnas kyi dga' ston grub nas/ rgyal ba'i bstan pa rin po che 'phel rgyas su 'byung bar byed pa ni dge 'dun gyi sde la rag las pas/ bod yul gyi mis rab tu byung ba'i bslab pa bsrung nus mi nus brtag pa'i phyir du/ me mo lug gi lo la rgya gar du rtsa ba'i sde pa bzhi las thams cad yod par smra ba'i sde pa bod du legs par dgongs nas/ dge slong bcu gnyis spyan drangs/ gnas lnga mkhyen pa zhi ba 'tshos mkhan po mdzad de/ mya ngan las 'das pa'i bsam pa mchog gis yongs su zin pa'i sad mi mi bdun gyis bstan pa'i rtsa ba so sor thar pa'i sdom pa mnos/ de'i rjes su blo gsal zhing yid gzhungs pa'i las ldan gyi skyes bu du mas rab tu byung zhing / shes rab kyi rtsal dang ldan pa dag la lo tsA bslabs pas/ byA ka ra Na'i gnad mtha' dag la sgro 'dogs chod cing / gzhung lugs kyi don khong du chud pa'i 'jig rten gyi mig gcig pu skad gnyis smra ba mang du byon/ lo paN de dag gis dam pa'i chos bsgyur zhing bshad nyan gyis gtan la 'bebs par byed pa la mi bsrun pa'i skye bo rnams rang nyams kyis spyod par mi nus pa'i khrims btsan po zhig dgos pas/