[A:༦༣]འཁོར་ལོ་འགྲོ་བའི་མགོན་དུ་རྒྱལ་པོའི་ཚུལ་གྱིས་རྣམ་པར་རོལ་པའི་སྤྲུལ་པའི་གང་ཟག་གི་ཕན་བདེའི་སྨན་ཡོན་དུ་ཐབས་མཁས་ཀྱི་མཛད་པ་བརྒྱ་ཕྲག་གིས་བརྩིགས་པའི་གཙུག་ལག་ཁང་དགའ་སྟོན་གྱི་གཞན་དབང་དུ་བཏང་ནས་མཆོད་པ་དང་ཞབས་ཏོག་མེད་པར་སྨྲ་བ། དམ་པའི་ཡུལ་ལ་སྐུར་པ་བཏབ་པའི་སྒྲིབ་པ་དཔག་ཏུ་མེད་པ་གསོག་ཅིང་། སྐྱེ་བོ་ཐ་ཆད་པ་འགའ་ཞིག་དུས་སྟོན་དུ་མིང་གིས་བཏགས་པའི་ཆང་སོགས་ཀྱིས་བག་མེད་པར་མྱོས་ཏེ། ཆོས་སྲིད་ཀྱི་བྱ་བ་མཐའ་དག་ཡལ་བར་འདོར་བའི་རྣམ་པ་ཆོས་ཀྱི་རྒྱལ་པོ་དེ་དག་ལ་འཆར་བའི་ཚིག་འདི་རྣམས་ལ་བརྟགས་ན། མཁས་པ་ཕལ་ཆེར་གྱི་སྦ་བཞེད་ལ་ཁུངས་སུ་མཛད་ཀྱང་བསླད་པ་མ་ཞུགས་པའི་ཁུངས་ཐུབ་པ་ཞིག་དཀའ་བར་སྣང་ངོ་༎
དེ་ལྟར་རབ་གནས་ཀྱི་དགའ་སྟོན་གྲུབ་ནས། རྒྱལ་བའི་བསྟན་པ་རིན་པོ་ཆེ་འཕེལ་རྒྱས་སུ་འབྱུང་བར་བྱེད་པ་ནི་དགེ་འདུན་གྱི་སྡེ་ལ་རག་ལས་པས། བོད་ཡུལ་གྱི་མིས་རབ་ཏུ་བྱུང་བའི་བསླབ་པ་བསྲུང་ནུས་མི་ནུས་བརྟག་པའི་ཕྱིར་དུ། མེ་མོ་ལུག་གི་ལོ་ལ་རྒྱ་གར་དུ་རྩ་བའི་སྡེ་པ་བཞི་ལས་ཐམས་ཅད་ཡོད་པར་སྨྲ་བའི་སྡེ་པ་བོད་དུ་ལེགས་པར་དགོངས་ནས། དགེ་སློང་བཅུ་གཉིས་སྤྱན་དྲངས། གནས་ལྔ་མཁྱེན་པ་ཞི་བ་འཚོས་མཁན་པོ་མཛད་དེ། མྱ་ངན་ལས་འདས་པའི་བསམ་པ་མཆོག་གིས་ཡོངས་སུ་ཟིན་པའི་སད་མི་མི་བདུན་གྱིས་བསྟན་པའི་རྩ་བ་སོ་སོར་ཐར་པའི་སྡོམ་པ་མནོས། དེའི་རྗེས་སུ་བློ་གསལ་ཞིང་ཡིད་གཞུངས་པའི་ལས་ལྡན་གྱི་སྐྱེས་བུ་དུ་མས་རབ་ཏུ་བྱུང་ཞིང་། ཤེས་རབ་ཀྱི་རྩལ་དང་ལྡན་པ་དག་ལ་ལོ་ཙཱ་བསླབས་པས། བྱཱ་ཀ་ར་ཎའི་གནད་མཐའ་དག་ལ་སྒྲོ་འདོགས་ཆོད་ཅིང་། གཞུང་ལུགས་ཀྱི་དོན་ཁོང་དུ་ཆུད་པའི་འཇིག་རྟེན་གྱི་མིག་གཅིག་པུ་སྐད་གཉིས་སྨྲ་བ་མང་དུ་བྱོན། ལོ་པཎ་དེ་དག་གིས་དམ་པའི་ཆོས་བསྒྱུར་ཞིང་བཤད་ཉན་གྱིས་གཏན་ལ་འབེབས་པར་བྱེད་པ་ལ་མི་བསྲུན་པའི་སྐྱེ་བོ་རྣམས་རང་ཉམས་ཀྱིས་སྤྱོད་པར་མི་ནུས་པའི་ཁྲིམས་བཙན་པོ་ཞིག་དགོས་པས།