[A:64]mes srong btsan sgam po sogs kyis bkas bcad pa'i khrims yid bzhin gyi nor bu rin po che bar skabs su mi dge bar spyod pa'i dri mas cung zad sbags pa rnams slar byi dor mdzad nas/ rgyal khrims gser gyi gnya' shing ltar lci bas mchog dman kun gyi gnya' ba gnon par mdzad do/ /
de nas rgya gar sogs yul gru du ma'i paN grub 'ga' zhig spyan drangs/ rgyal po'i bkas/ sde pa gzhan gsum bod la mi 'tsham pas/ thams cad yod smra'i lugs kyi 'dul ba'i sde snod dang / gzhan yang mdo sde dang / mngon pa ste sde snod rin po che rnam pa gsum/ rgyud sde 'og ma rnams bsgyur bar bkas gnang ba bzhin bka' bstan bcos mtha' dag bsgyur te/ bod chen po'i rgyal khams kun tu dam pa'i chos kyi nyin byed dbang pos lung dang rtogs pa'i pad tshal rgyas par mdzad/ rnal 'byor chen po sogs theg pa'i rtse mo khyab gdal du mi bsgyur bar/ snod ldan rnams kyis spyad byar bkas gnang ste/ lo tsA ba chen po bai ro tsa na dang / dge slong nam mkha'i snying po sogs snga phyir rgya gar du byon te zab don bla na med pa'i bdud rtsi'i zil mngar snying gi bum par gtams te/ bod du byon kyang sdig blon rnams kyi phra ma'i dbang gis re zhig spyugs na'ang / slar spyan drangs/ paN chen bi ma la mi tra'i grags snyan gyi nor bu btsan po'i 'gram par 'phyang bas gdan drangs te/ rdzogs pa chen po'i chos kyi zas ro brgya pas tshim par mdzad/ sngar bod 'dir bon dar zhing phal cher de'i rjes su 'jug pas/ chos sgrub pa'i gegs mang du byung yang / dus der lo paN rnams kyis bon gyi ring lugs mtha' dag dri ma med pa'i gtan tshigs rig pas tshar bcad/ slob dpon gyis mchims phu sogs su nges gsang rdo rje theg pa'i rgyud sgrub thabs mang du bsgyur te/ 'jig pa med pa'i sgrom bur rgyas btab nas las can la smon lam dang rje 'bangs du ma smin grol du mdzad pa'i