[A:༦༤]མེས་སྲོང་བཙན་སྒམ་པོ་སོགས་ཀྱིས་བཀས་བཅད་པའི་ཁྲིམས་ཡིད་བཞིན་གྱི་ནོར་བུ་རིན་པོ་ཆེ་བར་སྐབས་སུ་མི་དགེ་བར་སྤྱོད་པའི་དྲི་མས་ཅུང་ཟད་སྦགས་པ་རྣམས་སླར་བྱི་དོར་མཛད་ནས། རྒྱལ་ཁྲིམས་གསེར་གྱི་གཉའ་ཤིང་ལྟར་ལྕི་བས་མཆོག་དམན་ཀུན་གྱི་གཉའ་བ་གནོན་པར་མཛད་དོ། །
དེ་ནས་རྒྱ་གར་སོགས་ཡུལ་གྲུ་དུ་མའི་པཎ་གྲུབ་འགའ་ཞིག་སྤྱན་དྲངས། རྒྱལ་པོའི་བཀས། སྡེ་པ་གཞན་གསུམ་བོད་ལ་མི་འཚམ་པས། ཐམས་ཅད་ཡོད་སྨྲའི་ལུགས་ཀྱི་འདུལ་བའི་སྡེ་སྣོད་དང་། གཞན་ཡང་མདོ་སྡེ་དང་། མངོན་པ་སྟེ་སྡེ་སྣོད་རིན་པོ་ཆེ་རྣམ་པ་གསུམ། རྒྱུད་སྡེ་འོག་མ་རྣམས་བསྒྱུར་བར་བཀས་གནང་བ་བཞིན་བཀའ་བསྟན་བཅོས་མཐའ་དག་བསྒྱུར་ཏེ། བོད་ཆེན་པོའི་རྒྱལ་ཁམས་ཀུན་ཏུ་དམ་པའི་ཆོས་ཀྱི་ཉིན་བྱེད་དབང་པོས་ལུང་དང་རྟོགས་པའི་པད་ཚལ་རྒྱས་པར་མཛད། རྣལ་འབྱོར་ཆེན་པོ་སོགས་ཐེག་པའི་རྩེ་མོ་ཁྱབ་གདལ་དུ་མི་བསྒྱུར་བར། སྣོད་ལྡན་རྣམས་ཀྱིས་སྤྱད་བྱར་བཀས་གནང་སྟེ། ལོ་ཙཱ་བ་ཆེན་པོ་བཻ་རོ་ཙ་ན་དང་། དགེ་སློང་ནམ་མཁའི་སྙིང་པོ་སོགས་སྔ་ཕྱིར་རྒྱ་གར་དུ་བྱོན་ཏེ་ཟབ་དོན་བླ་ན་མེད་པའི་བདུད་རྩིའི་ཟིལ་མངར་སྙིང་གི་བུམ་པར་གཏམས་ཏེ། བོད་དུ་བྱོན་ཀྱང་སྡིག་བློན་རྣམས་ཀྱི་ཕྲ་མའི་དབང་གིས་རེ་ཞིག་སྤྱུགས་ནའང་། སླར་སྤྱན་དྲངས། པཎ་ཆེན་བི་མ་ལ་མི་ཏྲའི་གྲགས་སྙན་གྱི་ནོར་བུ་བཙན་པོའི་འགྲམ་པར་འཕྱང་བས་གདན་དྲངས་ཏེ། རྫོགས་པ་ཆེན་པོའི་ཆོས་ཀྱི་ཟས་རོ་བརྒྱ་པས་ཚིམ་པར་མཛད། སྔར་བོད་འདིར་བོན་དར་ཞིང་ཕལ་ཆེར་དེའི་རྗེས་སུ་འཇུག་པས། ཆོས་སྒྲུབ་པའི་གེགས་མང་དུ་བྱུང་ཡང་། དུས་དེར་ལོ་པཎ་རྣམས་ཀྱིས་བོན་གྱི་རིང་ལུགས་མཐའ་དག་དྲི་མ་མེད་པའི་གཏན་ཚིགས་རིག་པས་ཚར་བཅད། སློབ་དཔོན་གྱིས་མཆིམས་ཕུ་སོགས་སུ་ངེས་གསང་རྡོ་རྗེ་ཐེག་པའི་རྒྱུད་སྒྲུབ་ཐབས་མང་དུ་བསྒྱུར་ཏེ། འཇིག་པ་མེད་པའི་སྒྲོམ་བུར་རྒྱས་བཏབ་ནས་ལས་ཅན་ལ་སྨོན་ལམ་དང་རྗེ་འབངས་དུ་མ་སྨིན་གྲོལ་དུ་མཛད་པའི་