[A:69]lag gis/ yig cha gzhan dag la phyi rabs kyi rtsom rigs kho nar snang ba'i dpyad mi bzod pa sogs smra ba ni/ rje btsun sa paN gyis/ khwa tas mi gtsang zos pa'i mchu/ / gtsang ma'i ngos la 'bad de 'phyid/ / ces pa'i don dang mtshungs pas/ phu thag ma chod pa'i cal col gyi gtam nyung bar byos shig / rgyal po de la sras gtsang ma/ lha rje/ lhun grub/ dar ma/ ral pa can dang lnga byung yang / lhun grub chung ngur gshegs pas bang so med/ lha rje ni dgung lo bco lnga la gshegs pa'i pur skye ba bdun pa shel gyi brag la rgyas btab bo/ / smras pa/
dpal ldan gsang ba kun gyi gan mdzod las 'ongs 'dzam bu nA da mchog/
lus can yongs kyi bla na spyod pa'i mi bdag mchod sdong rab 'bar bar//
grub pa'i rang gzugs zlos gar gsar pa khams gsum man shel rtsig ngos la//
shar ba'i sa spyod 'gro 'di'i bsod nams 'bum phrag zong gis khugs las ci//
! sras che ba gtsang ma ni/ srid pa'i phun tshogs kyi dga' ston mtha' dag lha lam lus phra'i bzhin ras kyi ngos su 'dren byed rlung gi rgyal mtshan 'khyug pa ltar mi brtan zhing / nyes pa brgya phrag bskyed pa'i rtsa bar gzigs te mya ngan las 'das pa'i bsam pa mchog gis zin pa'i sgo nas rgyal ba'i bstan pa rin po