[A:༦༩]ལག་གིས། ཡིག་ཆ་གཞན་དག་ལ་ཕྱི་རབས་ཀྱི་རྩོམ་རིགས་ཁོ་ནར་སྣང་བའི་དཔྱད་མི་བཟོད་པ་སོགས་སྨྲ་བ་ནི། རྗེ་བཙུན་ས་པཎ་གྱིས། ཁྭ་ཏས་མི་གཙང་ཟོས་པའི་མཆུ། ། གཙང་མའི་ངོས་ལ་འབད་དེ་འཕྱིད། ། ཅེས་པའི་དོན་དང་མཚུངས་པས། ཕུ་ཐག་མ་ཆོད་པའི་ཅལ་ཅོལ་གྱི་གཏམ་ཉུང་བར་བྱོས་ཤིག་། རྒྱལ་པོ་དེ་ལ་སྲས་གཙང་མ། ལྷ་རྗེ། ལྷུན་གྲུབ། དར་མ། རལ་པ་ཅན་དང་ལྔ་བྱུང་ཡང་། ལྷུན་གྲུབ་ཆུང་ངུར་གཤེགས་པས་བང་སོ་མེད། ལྷ་རྗེ་ནི་དགུང་ལོ་བཅོ་ལྔ་ལ་གཤེགས་པའི་པུར་སྐྱེ་བ་བདུན་པ་ཤེལ་གྱི་བྲག་ལ་རྒྱས་བཏབ་བོ། ། སྨྲས་པ།
དཔལ་ལྡན་གསང་བ་ཀུན་གྱི་གན་མཛོད་ལས་འོངས་འཛམ་བུ་ནཱ་ད་མཆོག།
ལུས་ཅན་ཡོངས་ཀྱི་བླ་ན་སྤྱོད་པའི་མི་བདག་མཆོད་སྡོང་རབ་འབར་བར༎
གྲུབ་པའི་རང་གཟུགས་ཟློས་གར་གསར་པ་ཁམས་གསུམ་མན་ཤེལ་རྩིག་ངོས་ལ༎
ཤར་བའི་ས་སྤྱོད་འགྲོ་འདིའི་བསོད་ནམས་འབུམ་ཕྲག་ཟོང་གིས་ཁུགས་ལས་ཅི༎
༈ སྲས་ཆེ་བ་གཙང་མ་ནི། སྲིད་པའི་ཕུན་ཚོགས་ཀྱི་དགའ་སྟོན་མཐའ་དག་ལྷ་ལམ་ལུས་ཕྲའི་བཞིན་རས་ཀྱི་ངོས་སུ་འདྲེན་བྱེད་རླུང་གི་རྒྱལ་མཚན་འཁྱུག་པ་ལྟར་མི་བརྟན་ཞིང་། ཉེས་པ་བརྒྱ་ཕྲག་བསྐྱེད་པའི་རྩ་བར་གཟིགས་ཏེ་མྱ་ངན་ལས་འདས་པའི་བསམ་པ་མཆོག་གིས་ཟིན་པའི་སྒོ་ནས་རྒྱལ་བའི་བསྟན་པ་རིན་པོ་