[A:78]zer bas/ khri lde yum brtan du ming chags/ de nas mnga' bdag gnyis lang tsho yar ldan du gyur pa dang / chos blon rnams kyis rgyu mtshan brjod pa ltar/ jo bo rnam gnyis dang byams mgon rnams so so'i khri la bzhugs su bcug cing / gtsug lag khang rnams su mchod pa'i rgyun 'dzugs pa sogs mdzad/ 'on kyang mnga' ris la ma 'cham par 'od bsrungs kyis g.yon ru dang / yum brtan gyis sbus ru bzung ste 'khrug long chen po byung bas/ de dag nas bzung ste rje gnya' khri btsan po'i gdung brgyud kyis bod kyi spyi la dbang ma sgyur skad do//
de nas mi ring bar gyen log byung ste/ de yang gyen log ni/ nam mkha' la bya gcig 'phur bar bya gzhan mang po 'dus te gnod pa byed par dpe byas/ thog mar khams nas log de yang rkyen blon po bran kha dpal yon nyes med du khrims la sbyar ba'i rkyen gyis gnod sbyin du skyes nas bskul ba po byas te lha 'dre gdug pa can du mas mi rnams brlams par/ khu ston gyis mdzad pa'i bstan bcos rin cen bang mdzod du bshad cing / gyen log gi rjes su bang so phal cher kyang brus te bshig go/
de ltar yum brtan gyi brgyud pa skyid g.yor kun la shin tu mang zhing / 'od bsrungs gshegs pa'i bang so 'phrul rgyal gyi rgyab tu brtsigs/ de nas bang so rtsig pa'i srol nub cing / de'i sras mnga' bdag dpal 'khor btsan/ de la sras khri bkra shis brtsegs pa dpal dang / khri skyid lde nyi ma mgon gnyis 'khrungs so//
! nyi ma mgon gyis mnga' ris su byon te chab srid bzung / sras gsum byung ba'i che ba dpal lde rig pa mgon gyis mang yul bzung / bar pa bkra shis lde mgon gyis spu rangs bzung / chung ba lde gtsug mgon gyis zhang zhung