[A:༧༨]ཟེར་བས། ཁྲི་ལྡེ་ཡུམ་བརྟན་དུ་མིང་ཆགས། དེ་ནས་མངའ་བདག་གཉིས་ལང་ཚོ་ཡར་ལྡན་དུ་གྱུར་པ་དང་། ཆོས་བློན་རྣམས་ཀྱིས་རྒྱུ་མཚན་བརྗོད་པ་ལྟར། ཇོ་བོ་རྣམ་གཉིས་དང་བྱམས་མགོན་རྣམས་སོ་སོའི་ཁྲི་ལ་བཞུགས་སུ་བཅུག་ཅིང་། གཙུག་ལག་ཁང་རྣམས་སུ་མཆོད་པའི་རྒྱུན་འཛུགས་པ་སོགས་མཛད། འོན་ཀྱང་མངའ་རིས་ལ་མ་འཆམ་པར་འོད་བསྲུངས་ཀྱིས་གཡོན་རུ་དང་། ཡུམ་བརྟན་གྱིས་སྦུས་རུ་བཟུང་སྟེ་འཁྲུག་ལོང་ཆེན་པོ་བྱུང་བས། དེ་དག་ནས་བཟུང་སྟེ་རྗེ་གཉའ་ཁྲི་བཙན་པོའི་གདུང་བརྒྱུད་ཀྱིས་བོད་ཀྱི་སྤྱི་ལ་དབང་མ་སྒྱུར་སྐད་དོ༎
དེ་ནས་མི་རིང་བར་གྱེན་ལོག་བྱུང་སྟེ། དེ་ཡང་གྱེན་ལོག་ནི། ནམ་མཁའ་ལ་བྱ་གཅིག་འཕུར་བར་བྱ་གཞན་མང་པོ་འདུས་ཏེ་གནོད་པ་བྱེད་པར་དཔེ་བྱས། ཐོག་མར་ཁམས་ནས་ལོག་དེ་ཡང་རྐྱེན་བློན་པོ་བྲན་ཁ་དཔལ་ཡོན་ཉེས་མེད་དུ་ཁྲིམས་ལ་སྦྱར་བའི་རྐྱེན་གྱིས་གནོད་སྦྱིན་དུ་སྐྱེས་ནས་བསྐུལ་བ་པོ་བྱས་ཏེ་ལྷ་འདྲེ་གདུག་པ་ཅན་དུ་མས་མི་རྣམས་བརླམས་པར། ཁུ་སྟོན་གྱིས་མཛད་པའི་བསྟན་བཅོས་རིན་ཅེན་བང་མཛོད་དུ་བཤད་ཅིང་། གྱེན་ལོག་གི་རྗེས་སུ་བང་སོ་ཕལ་ཆེར་ཀྱང་བྲུས་ཏེ་བཤིག་གོ།
དེ་ལྟར་ཡུམ་བརྟན་གྱི་བརྒྱུད་པ་སྐྱིད་གཡོར་ཀུན་ལ་ཤིན་ཏུ་མང་ཞིང་། འོད་བསྲུངས་གཤེགས་པའི་བང་སོ་འཕྲུལ་རྒྱལ་གྱི་རྒྱབ་ཏུ་བརྩིགས། དེ་ནས་བང་སོ་རྩིག་པའི་སྲོལ་ནུབ་ཅིང་། དེའི་སྲས་མངའ་བདག་དཔལ་འཁོར་བཙན། དེ་ལ་སྲས་ཁྲི་བཀྲ་ཤིས་བརྩེགས་པ་དཔལ་དང་། ཁྲི་སྐྱིད་ལྡེ་ཉི་མ་མགོན་གཉིས་འཁྲུངས་སོ༎
༈ ཉི་མ་མགོན་གྱིས་མངའ་རིས་སུ་བྱོན་ཏེ་ཆབ་སྲིད་བཟུང་། སྲས་གསུམ་བྱུང་བའི་ཆེ་བ་དཔལ་ལྡེ་རིག་པ་མགོན་གྱིས་མང་ཡུལ་བཟུང་། བར་པ་བཀྲ་ཤིས་ལྡེ་མགོན་གྱིས་སྤུ་རངས་བཟུང་། ཆུང་བ་ལྡེ་གཙུག་མགོན་གྱིས་ཞང་ཞུང་