[A:480]grags pa mdo khams stod pa kun mkhyen sangs rgyas rgyal mtshan gyis/ skye ba bcu gsum bar ma chad pa ru/ /mkhas pa paNDi ta ru 'khrungs gyur te/ /'gro mang thar pa'i lam la rab bkod nas/ /'phags yul bstan pa gsal mdzad de la 'dud/ /ces rgya gar shar nub tu bstan 'gro'i don rgya chen po mdzad par bshad/ mkhan chen legs 'byung gi gsung las kyang / rgya gar gyi paN grub bcu bzhi tsam gyi skye ba thugs la dran pa yin par bshad/ gsung sgros dag las kyang / rje 'di dang gu ge paNDi ta rgya gar du sku skye ba mnyam du byung ba'i lo rgyus gsungs so/ /de ltar paN grub de rnams kyi rnam thar re re nas bris pa ni ma mthong ngo / /bod du yang rje btsun grags pa'i slob ma dpyil sgom tshul khrims rgyal por 'khrungs nas gsung ngag sogs thugs nyams su bzhes shing / lam 'bras kyi bka' rgya thim pa'i gzigs snang du/ rje btsun gyi phyag nas 'od kyi dru bu byung nas rje'i phyag tu babs pa'i mtshon byed kyang 'di yin par bshad/ 'di'i rgyu mtshan rgyas par mkhas grub dpal ldan don grub kyis mdzad pa'i lam 'bras kyi bka' rgya thim pa'i gzigs snang gsal byed kyi yig char blta'o/ /de la sogs pa dpal ldan sa skya pa yab sras gsum gyi gsung gi gsang mdzod zab mo 'dzin pa'i thugs sras du mar 'khrungs te/ gu ge paN chen gyis/ dpal ldan thugs rje'i bdag nyid sa skya pa/ /shes bya mtha' dag legs gzigs bsod nams rtse/ /rdo rje theg pa'i mnga' bdag grags pa 'dzin/ /khyod kyi mkhyen brtse las 'khrungs sras kyi gtso/ /zhes gsungs so/ ! /gsum pa sku tshe 'dir yang sangs rgyas kyi bstan pa la bya ba mdzad tshul la/ rje nyid kyi slob ma rnams kyis mdzad pa'i rnam thar gyi yi ge mang du snang ba las/ 'dir thugs sras sems dpa' chen po mus chen dkon mchog rgyal mtshan gyis mdzad pa'i rnam thar gzhir bzhag der mi gsal ba rang gis ji ltar