[A:572]
khyad par phul byung gi rgyan/
e waM chos ldan longs spyod rdzogs sku'i zhing / /'di ni sa la gnas pa'i 'og min zhes/ /rig pa 'dzin pa kun du dga' ba'i dbyangs/ /dbyar skyes sprin gyi rnga sgras mtshon ma gyur/ /gzugs can rgyan ni/
de ltar yon tan rgyas pa'i dri bzang spos/ /dbang po kun nas tshim pa'i bhra ma raH/ /nyam chung 'di ko dad pa'i 'dab brkyang ste/ /bstod tshig mgrin pa'i pi wang cung zad brdung / /gzugs can/
rje btsun kun dga'i thugs dgongs zab pa'i mkhar/ /rnam par rgyal ma'i lung bstan bdud rtsi'i zer/ /thugs rje'i dri bzhon gar gyi rol mo las/ /dge mtshan 'od dkar bye bas sgeg pa'i dpal/ /sa gzhi'i dbyibs la sems med kyi rab brtags/
rgyal kun byin rlabs 'dus pa'i lhun po ni/ /gyen du 'degs bzhed nor gyi blo gros ma/ /rang gzugs dman pa btang nas dge ba'i lus/ /'dab rgyas padma'i dkyil 'khor yangs par sprul/ /bzhin sgra can gyi rab brtags ni/
de mthong lha rnams bzhad pa'i ngo mtshar la/ /'gran pa bzhin du khyab 'jug rtse ba'i gnas/ baiDUrya sngon ma rgata 'jo sgeg bcas/ /rtsibs brgyad 'khor lo'i gzugs kyis bla nas phub/ /phyogs kyi dge mtshan la srid pa can gyi rgyan ni/
de tshe phyogs kyi mdzes ma'i 'gram pa la/ /bkra shis rtags kyi byed po snang brnyan brgyad/ /bris pa med par rnam bkra'i mdzes sdug gis/ /byed po'i rdzu 'phrul pir yang skyengs pa snyam/ /gzigs lam gyi spang ri la rab brtags/
ma ra ka ta'i rin po che ljang gu/
mdangs tshogs rgyas pa'i tshon/ /phyogs kun khyab par sbrel ba'i ne'u thang / /nyon mongs rtsub po'i reg bya skyob pa'i ched/ /chu lha'i bla gos sa la bkram pa bzhin/ /grog sul dmar ba'i mtshon byed nges bstan gyi rgyan/
bsdu dngos bzhi yis skal bzang gdul bya'i khams/ /ma lus dbang du bsdus pas dbang gi mdangs/ /byu ru'i 'khri shing dkris pa'i nags klung ltar/ /ri bo'i sal sul phar cher dmar ba'i mdog /chu phran sna tshogs 'bab tshul ni/
shang shong ri sul shel gyi 'bab stegs las/ /