[A:621]drug ni/ zhing 'dir dkon pa'i zhes sogs tshigs bcad drug ste/ re re yang rje nyid kyi mtshan dang spel ba'o/ /gsum pa 'bras bu 'grub pa'i ched du smon lam gdab pa ni/ deng nas bzung ste zhes sogs tshigs bcad bzhi ste/ dang pos gdams pa'i rgyu/ gnyis pas gdams pa dngos la pha rol tu phyin pa'i nyams len/ gsum pas rdo rje theg pa'i nyams len/ bzhi pas de dag gi 'bras bu 'grub par smon pa rtsom pa po'i ming dang sbyar ba'o/ /gsum pa ni/ rje btsun bla ma zhes sogs tshigs bcad drug ste/ phyis drug bsnan pa ni/ dben gnas dngul chur zhes sogs tshigs bcad gcig dang / ting krol gnas su zhes sogs tshigs bcad gnyis dang / ris bsgyur phyogs ni zhes sogs gsum ste shin tu dag cing yid ches pa'i gnas su gyur te/ gdul bya rnams kyi dad pa'i yid mtshor khyab par byas pa yin no/ /yon tan rgya mtsho'i yon tan cha tsam rnam par bshad pa las byung ba'i/ /bsod nams seng ges bsod nams ji snyed bsags pa de yis lus can kun/ /sdug bsngal rgya mtsho'i sdug bsngal kun las brgal te bde ba dam pa'i gling / /rnam mang 'gro la rnam mang phan pa bsgrub pa'i sangs rgyas myur thob shog /rje btsun bla ma mus pa chen po'i rnam par thar pa ngo mtshar rgya mtsho zhes bya ba 'di ni rje de nyid kyi slob ma dad pa brtan po dang ldan pa dag gis bskul nas/ rje de nyid kyi zhabs rdul spyi bos blangs pa dge slong bsod nams seng ges shing mo bya'i lo snron gyi zla ba'i yar tshes brgyad la gling kha bde ba can du sbyar ba'o//