[A:༦༢༡]དྲུག་ནི། ཞིང་འདིར་དཀོན་པའི་ཞེས་སོགས་ཚིགས་བཅད་དྲུག་སྟེ། རེ་རེ་ཡང་རྗེ་ཉིད་ཀྱི་མཚན་དང་སྤེལ་བའོ། །གསུམ་པ་འབྲས་བུ་འགྲུབ་པའི་ཆེད་དུ་སྨོན་ལམ་གདབ་པ་ནི། དེང་ནས་བཟུང་སྟེ་ཞེས་སོགས་ཚིགས་བཅད་བཞི་སྟེ། དང་པོས་གདམས་པའི་རྒྱུ། གཉིས་པས་གདམས་པ་དངོས་ལ་ཕ་རོལ་ཏུ་ཕྱིན་པའི་ཉམས་ལེན། གསུམ་པས་རྡོ་རྗེ་ཐེག་པའི་ཉམས་ལེན། བཞི་པས་དེ་དག་གི་འབྲས་བུ་འགྲུབ་པར་སྨོན་པ་རྩོམ་པ་པོའི་མིང་དང་སྦྱར་བའོ། །གསུམ་པ་ནི། རྗེ་བཙུན་བླ་མ་ཞེས་སོགས་ཚིགས་བཅད་དྲུག་སྟེ། ཕྱིས་དྲུག་བསྣན་པ་ནི། དབེན་གནས་དངུལ་ཆུར་ཞེས་སོགས་ཚིགས་བཅད་གཅིག་དང༌། ཏིང་ཀྲོལ་གནས་སུ་ཞེས་སོགས་ཚིགས་བཅད་གཉིས་དང༌། རིས་བསྒྱུར་ཕྱོགས་ནི་ཞེས་སོགས་གསུམ་སྟེ་ཤིན་ཏུ་དག་ཅིང་ཡིད་ཆེས་པའི་གནས་སུ་གྱུར་ཏེ། གདུལ་བྱ་རྣམས་ཀྱི་དད་པའི་ཡིད་མཚོར་ཁྱབ་པར་བྱས་པ་ཡིན་ནོ། །ཡོན་ཏན་རྒྱ་མཚོའི་ཡོན་ཏན་ཆ་ཙམ་རྣམ་པར་བཤད་པ་ལས་བྱུང་བའི། །བསོད་ནམས་སེང་གེས་བསོད་ནམས་ཇི་སྙེད་བསགས་པ་དེ་ཡིས་ལུས་ཅན་ཀུན། །སྡུག་བསྔལ་རྒྱ་མཚོའི་སྡུག་བསྔལ་ཀུན་ལས་བརྒལ་ཏེ་བདེ་བ་དམ་པའི་གླིང༌། །རྣམ་མང་འགྲོ་ལ་རྣམ་མང་ཕན་པ་བསྒྲུབ་པའི་སངས་རྒྱས་མྱུར་ཐོབ་ཤོག །རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཚར་རྒྱ་མཚོ་ཞེས་བྱ་བ་འདི་ནི་རྗེ་དེ་ཉིད་ཀྱི་སློབ་མ་དད་པ་བརྟན་པོ་དང་ལྡན་པ་དག་གིས་བསྐུལ་ནས། རྗེ་དེ་ཉིད་ཀྱི་ཞབས་རྡུལ་སྤྱི་བོས་བླངས་པ་དགེ་སློང་བསོད་ནམས་སེང་གེས་ཤིང་མོ་བྱའི་ལོ་སྣྲོན་གྱི་ཟླ་བའི་ཡར་ཚེས་བརྒྱད་ལ་གླིང་ཁ་བདེ་བ་ཅན་དུ་སྦྱར་བའོ།།