[A:620]mthong med par 'dod pa la btang ba'i rigs pa rnams ni/ mkhas rlom gzhan su la yang ma mthong ngo / /legs bshad rtsom pa'i tshe rna bar snyan cing 'brel chags la/ mkhas pa dag gis mthong na sngon med pa'i rtogs pa bskyed pa ni/ rje nyid kyi bka' 'bum mthong bas gsal lo/ /chos brgyad mgo snyoms pa ni/ kun la grags shing khyad par du/ sa skya 'khon gyi gdung brgyud la sogs pa che dgu dag gis chos zhus pas/ sku tshe la mi gzan nam zhus pas/ de la dga' tshor med pas skyon med gsung pa lta bu'o/ /yo byad kyi 'dzin pa dang bral ba ni/ yo byad phyag tu byung ba thams cad la yang na bla ma la 'bul ba/ yang na bla ma'i dus mchod/ yang na rten gsum bzhengs pa/ yang na dge 'dun gyi bsnyen bkur mdzad pa las/ rang don du til 'bru tsam yang mi 'chang ba mngon sum du gyur pa 'di nyid do/ /rgyu mtshan de dag gi phyir na/ snyan pa'i grags pas sa steng thams cad khyab ste/ dgung lo don brgyad bzhes pa na yang / e waM chos ldan dang / ngam rings dang / mnga' ris gsum nas gdan 'dren pa cig car du byung ste/ thams cad kyis mgrin gcig tu bdag cag rnams kyi sa phyogs zhabs kyis bcags nas/ zhal bstan pa tsam zhig mdzad na yang / 'gro ba dpag tu med pa'i don du 'gyur ba yod do zhes zhus so/ /de'i tshe rgyud sde 'dzin pa chen po kun dga' dbang phyug pa/ chos rje bzang po'i zhabs kyi bka' bzhin du/ e waM chos ldan gyi gdan sar bskos te/ bshad sgrub rgyun mi chad par mdzad do/ /gnyis pa bsod nams spel ba'i phyir/ rgyun bshags bya ba la bdun las/ phyag 'tshal ba'i yan lag ni/ srid na khyod 'dra'i zhes sogs tshigs bcad bzhi ste/ dang po gnyis kyis dkon mchog gi sgra don/ rgyud bla ma las drug gsungs pa dang sbyar/ gsum pas rgyal gyi sgra don yab yum sras gsum dang sbyar/ bzhi pas mtshan gyi sgra don sku gsung thugs dang sbyar ba'o/ /yan lag lhag ma