[A:28a] thams cad rdzogs nas yod kyi/ da lan jo bo bod du ma byon na khyed dam pa rnams kyi thugs rje yang de ltar bas pas/ nged kyang bya ba ci bder spyad par bgyi'o zhes/ khyed 'dul ba 'dzin pas lo brgyus rgyus 'di rnams jo bo la zhus pa'i tha la 'byon du ma bzhed na'ang/ snyan du thebs par mdzad do gsungs nas/ bshum cing gsung byon te/ lha btsun mi chen po gcig gis de ltar mdzad pas/ lo tsA bas kyang yin min gyi tshig zur tsam yang smra ma nus/ de'i stobs kyis lus srog dang/ bar chad kyi dka' tshegs/ tshe 'di'i bde skyid gang la'ang ma chags par dpon g.yog bdun gyis gser rnams khyer te/ rgya gar gyie lam du zhugs pa dang/ lha btsun pas skyel thung mdzad de/ dge slong khyod kyis nga phyogs bya ba byas/ da lan dka' ba chen na'ang phar byon la/ 'bad rtsol chen pos lus dang srog la bsdos/ 'khor nas byas shes bka' drin gzo bar bya/ zhes gsungs nas/ phyi phyag mdzad de gshegs/ slar yang jo bo thugs rje chen po la gsol ba 'debs kyi gshegs par zhu gsung/ de nas bal po rdzong la byon tsa na mi ring gcig dang phrad pas/ khyed yul sa thag ring por don chen po la 'gro bar snang ba/ 'di skad zer gyi song dang/ don grub nas 'ong gi/ dkon mchog gsum la phyag 'tshal lo/ kha ba can gyi rgyal khams su/ rgyal ba thams cad kyi 'byung gnas/ dam pa'i chos 'phel bar gyur cig/ ces brjod cing song na/ lam du'ang nye zho mi 'byung zer/ khyed su lags byas pas/ rim gyis shes par 'gyur gyi zer/ de nas bal po'i mtha' mkhob tu sleb pa na/ a tsa ra la gnas g.yar bas/ snyug khang gcig tu bsnyal/ khos gser yod par shes nas snyug khang la me spar te/ bsad nas gser 'khyer bar 'dod pa dang/