[A:38]mtshar gtam/ /snying gi padmar son pa'i skal bzang bdag /dad dang gus pa'i spu long rab g.yos te/ /yon tan rdzogs par brjod la dbang ma mchis/ /de lta'i rnam thar yid 'phrog mA li kaH/ /shel dkar glegs bu'i ngos la dbyangs gsal gzugs/ /gur gum zol gyis 'ongs pa'i dri bzhon gyis/ /kun gsal pha mthar son pa bdag gis spro/ /mchod sbyin brgya pa'i gzhu ring dang 'grogs sprin dkar gzhon nu'i phang phung dang / rnam bkra'i me tog lang ling gar byed chu shel gsar pa'i rkang 'thung bzhin/ /rab 'byams rgyal ba'i mkhyen brtse'i zlos gar rgya mtsho'i lha mo sgro ldan ma/ /tshur spyon kho bo'i snying dbus bzhugs la ngag gi spobs pa mchog stsol mdzod/ /de yang ji ltar mtha' klas pa'i nam mkha'i khyon gyis gzhal ba'i skye rgu rnams kyi nyer 'tsho'i dbang po/ /gting dpag dka' ba'i thugs bskyed dang / smon lam gyi chu mtsho chen po las ni legs par 'ongs/ bsod nams dang ye shes kyi tshogs rlabs po che'i dri bzhon gyi shing rtas ni lan cig ma yin par yang yang drangs/ sgrib gnyis chu ldan gyi rnam par dben pa'i chos sku bde ba chen po'i mkha' dbyings su ni legs par son/ gzugs sku rnam gnyis kyis rol rtsed zla nyi'i dkyil 'khor rmad du byung ba las phyogs ris dang bral ba'i 'phrin las kyi 'od zer grangs med pa rtag tu 'phro ba'i ngang tshul can gyi rgyal ba'i dbang po rnams ni/ nam yang zab mo chos kyi sku las g.yo ba med bzhin du ji ltar yid bzhin nor bu rin po che dbang gi rgyal po dang / dpag bsam gyi ljon shing las 'dod dgu mtha' dag 'byung ba'am/